पुणे : नेपाळमध्ये झालेल्या मुसळधार पावसामुळे आणि रसुवा जिल्ह्यातील भोटे कोशी नदीला आलेल्या भीषण महापुरामुळे तेथील जनजीवन पूर्णपणे विस्कळीत झाले आहे. या नैसर्गिक आपत्तीत अनेक नागरिकांचा मृत्यू झाला असून, विविध भागांत पर्यटक अडकल्याची भीती व्यक्त केली जात आहे.
याच पार्श्वभूमीवर सातारा जिल्ह्यातील महाबळेश्वर येथील 10 महिला पर्यटक नेपाळमध्ये गेल्याची माहिती समोर आली होती. सुदैवाने, या सर्व महिला पोखरा येथील एका हॉटेलमध्ये सुखरूप असून, जिल्हा प्रशासनाने त्यांच्याशी थेट संपर्क साधून त्यांच्या सुरक्षेची खातरजमा केली आहे.
आपत्तीच्या या काळात सातारा जिल्हा प्रशासन पूर्णपणे सतर्क झाले आहे. नेपाळमध्ये अडकलेल्या जिल्ह्यातील इतर पर्यटकांची माहिती मिळवण्यासाठी जिल्हाधिकारी कार्यालयात विशेष नियंत्रण कक्ष सुरू करण्यात आला आहे. जर साताऱ्यातील कोणताही नागरिक किंवा पर्यटक नेपाळमधील पूरस्थितीत अडकला असेल किंवा ज्यांचा त्यांच्या कुटुंबाशी संपर्क होत नसेल, तर त्यांच्या नातेवाईकांनी खालील क्रमांकांवर तातडीने संपर्क साधावा:
दूरध्वनी क्रमांक: 02162-232349, 232175
मोबाईल क्रमांक: 9657521122
नियंत्रण कक्षाशी संपर्क साधताना नातेवाईकांनी संबंधित व्यक्तीचे पूर्ण नाव, मोबाईल नंबर, नेपाळमधील सध्याचे ठिकाण किंवा हॉटेलचे नाव, त्यांच्या प्रवासाचा तपशील आणि कुटुंबाचा संपर्क क्रमांक प्रशासनाला उपलब्ध करून द्यावा.
जिल्हा प्रशासनाने नागरिकांना कोणत्याही प्रकारच्या अफवांवर विश्वास न ठेवण्याचे आणि न घाबरण्याचे आवाहन केले आहे. आपत्तीग्रस्त भागातील पर्यटकांच्या सुरक्षेसाठी प्रशासन नेपाळमधील स्थानिक यंत्रणांशी सतत समन्वय साधून आहे. अधिकृत आणि अचूक माहितीसाठी नागरिकांनी थेट जिल्हा प्रशासनाशी संपर्क साधावा.
