पुणे: महाराष्ट्रातील तरुणांसाठी एक आनंदाची बातमी आहे. एसटी महामंडळात (MSRTC Recruitment) लवकरच 17,450 कंत्राटी पदांसाठी भरती केली जाईल, अशी माहिती परिवहन मंत्री प्रताप सरनाईक यांनी दिली आहे. या निर्णयामुळे एसटी सेवा अधिक कार्यक्षम होईल आणि नवीन इलेक्ट्रिक बसेससाठी आवश्यक मनुष्यबळ उपलब्ध होईल. या भरतीमुळे राज्यातील अनेक बेरोजगार तरुणांना रोजगाराची चांगली संधी मिळणार आहे.
भरती प्रक्रिया आणि पदांचा तपशील:
एसटी महामंडळाच्या 300 व्या कंत्राटी बैठकीत हा महत्त्वाचा निर्णय घेण्यात आला. या भरतीमध्ये चालक (Driver) आणि सहाय्यक (Helper) या पदांसाठी अर्ज मागवले जाणार आहेत. निवड झालेल्या उमेदवारांसोबत तीन वर्षांचा करार केला जाईल. कामावर रुजू होण्यापूर्वी, एसटी महामंडळ या सर्व उमेदवारांना योग्य प्रशिक्षण देईल जेणेकरून ते आपली जबाबदारी प्रभावीपणे पार पाडू शकतील.
अर्ज कसा कराल आणि वेतन किती?
या भरतीसाठीची निविदा प्रक्रिया येत्या 2 ऑक्टोबरपासून सुरू होणार आहे. ही ई-निविदा प्रक्रिया सहा प्रादेशिक विभागांनुसार राबवली जाईल. कंत्राटी नोकरीवर निवड झालेल्या उमेदवारांना दरमहा किमान 30,000 रुपये वेतन दिले जाईल.
