रेल्वेमध्ये नोकरीची संधी शोधणाऱ्या तरुणांसाठी पश्चिम रेल्वेकडून मोठी भरती जाहीर करण्यात आली आहे. रेल्वे भरती कक्षाने अप्रेंटिसशिप अंतर्गत एकूण 2865 पदांसाठी अर्ज मागवले आहेत. यासाठी अधिकृत अधिसूचना प्रसिद्ध झाली असून अर्ज प्रक्रिया 30 ऑगस्ट 2025 पासून सुरू होणार आहे. उमेदवारांना अर्ज करण्यासाठी 29 सप्टेंबर 2025 पर्यंतची मुदत देण्यात आली आहे.
या भरतीत सामान्य प्रवर्गासाठी 1150, अनुसूचित जातीसाठी 433, अनुसूचित जमातीसाठी 215, इतर मागासवर्गीय प्रवर्गासाठी 778 तर आर्थिकदृष्ट्या दुर्बल घटकांसाठी 289 पदांचा समावेश आहे. उमेदवाराचे वय अर्जाच्या तारखेपर्यंत किमान 15 वर्षे आणि कमाल 24 वर्षे असणे आवश्यक आहे. सरकारच्या नियमांनुसार आरक्षित प्रवर्गांना वयोमर्यादेत सवलत मिळणार आहे. अनुसूचित जाती-जमातींना 5 वर्षे, ओबीसींना 3 वर्षे आणि दिव्यांग उमेदवारांना 10 वर्षे सूट दिली जाणार आहे.
शैक्षणिक पात्रतेबाबत उमेदवाराने किमान 50 टक्के गुणांसह 10 वी व 12 वी उत्तीर्ण असणे आवश्यक आहे. त्यासोबत एनसीव्हीटी किंवा एससीव्हीटी मान्यताप्राप्त संस्थेकडून राष्ट्रीय व्यापार प्रमाणपत्र (आयटीआय) असणे बंधनकारक आहे. या भरतीसाठी कोणतीही लेखी परीक्षा होणार नसून निवड ही केवळ 10 वी आणि 12 वीमध्ये मिळालेल्या गुणांच्या आधारे होणार आहे. गुणवत्ता यादी तयार करून अंतिम निवड केली जाईल.
अर्ज करण्यासाठी उमेदवारांना शुल्क भरावे लागेल. सामान्य, ओबीसी आणि ईडब्ल्यूएस उमेदवारांना 100 रुपये अर्ज शुल्क व 41 रुपये प्रक्रिया शुल्क भरावे लागणार आहे. तर एससी/एसटी उमेदवारांना अर्ज शुल्कातून सूट असून त्यांना केवळ प्रक्रिया शुल्क 41 रुपये द्यावे लागेल.
अर्ज सादर करताना पासपोर्ट आकाराचा फोटो, 10 वीचे प्रमाणपत्र, आयटीआय प्रमाणपत्र आणि जात प्रमाणपत्र (लागू असल्यास) जोडणे आवश्यक आहे. पात्र उमेदवारांनी अधिकृत संकेतस्थळावरून दिलेल्या मुदतीत अर्ज करावा, असे पश्चिम रेल्वेकडून आवाहन करण्यात आले आहे.
