पुणे प्राईम न्यूज डेस्क: आपण निरोगी राहण्यासाठी अनेक प्रयत्न करत असतो. काहीना काहीतरी नवीन करण्याचा प्रयत्नही करत असतो. पण अनेकदा आजारपण हे येत असते. त्यात उतारवयात पचनक्रिया बिघडल्याचा त्रास सर्वसामान्य आहे. यात पित्त खवळते. ॲसिडिटीची समस्याही मोठ्या प्रमाणात जाणवते. मात्र, असे काही घरगुती उपाय आहेत त्याचा अवलंब केल्यास नक्कीच फायदा होऊ शकतो.
तेलकट-तूपकट किंवा जळजळीत खाल्लेले तरुण वयात किंवा लहान वयात पचते. पण पुढे तीच सवय त्रासदायक ठरते. त्यामुळे अतितेलकट, चमचमीत दररोज खायची सवय असल्यास ती सर्वप्रथम बदला. आपल्या शरीराची गरज, प्रकृतीचे संकेत ओळखून त्याप्रमाणे वागायला शिका. म्हणजे भूक नसतानाही खाणे, पोट भरल्यानंतरही खाणे, भूक लागली तरी न जेवणे, जेवण लांबवणे हे टाळायला हवे.
आपल्या शरीराला व्यायामाची गरज आहे. तरच आपले अन्नपचन सुलभ होईल. त्यामुळे नियमित चालणे आणि व्यायाम नसेल तर गोळ्या घेऊनही ॲसिडिटी संपायची नाही. त्यासाठी भरपूर पाणी प्यायला हवे. अनेक आम्ल अन्नपचनाच्या प्रक्रियेत तयार होत असतात. त्यावेळी पाणी त्याचे संतुलन राखण्याचे काम करते. त्यामुळे पुरेसे पाणी प्यायलाच हवे. थंड पाण्याऐवजी कोमट पाणी प्यायलात तर जास्त फायदा मिळेल.
