पुणे: सध्या महाराष्ट्रात उन्हाचा पारा 40 अंशांच्या वर पोहोचला आहे. घामावाटे शरीरातील पाणी आणि क्षार बाहेर पडल्यामुळे थकवा, चक्कर येणे आणि डिहाइड्रेशनचा त्रास वाढतोय. बाजारात मिळणारी थंड पेये किंवा ‘कोल्ड ड्रिंक्स’ तात्पुरती तहान भागवतात, पण ती आरोग्यासाठी घातक ठरू शकतात. अशा वेळी आपल्या घरात उपलब्ध असलेल्या नैसर्गिक पेयांकडे वळणे हाच सर्वोत्तम पर्याय आहे. उन्हाळ्यात शरीराला ‘हायड्रेटेड’ ठेवण्यासाठी खालील 5 पेये तुमच्या आहारात नक्की असावीत:
ताक:
ताक हे उन्हाळ्यातील सर्वात उत्तम पेय मानले जाते. यामध्ये जिरे पूड, काळं मीठ आणि कोथिंबीर टाकून प्यायल्यास पचनशक्ती सुधारते आणि शरीराचे तापमान नियंत्रित राहते. दह्यापेक्षा ताक हलके असल्याने ते दुपारच्या जेवणानंतर घेणे फायदेशीर ठरते.
शहाळ्याचे पाणी:
नारळ पाणी किंवा शहाळ्याचे पाणी हे नैसर्गिक ‘एनर्जी ड्रिंक’ आहे. यामध्ये पोटॅशियम आणि मॅग्नेशियम मुबलक प्रमाणात असते, जे शरीरातील क्षारांची कमतरता भरून काढते. उन्हातून आल्यावर शहाळ्याचे पाणी प्यायल्याने त्वरित तरतरी येते.
कैरीचे पन्हे:
उन्हाळ्याच्या सुरुवातीला कैरीचे पन्हे प्रत्येक घरात बनवले जाते. कैरीमध्ये व्हिटॅमिन सी भरपूर असते. हे पेय केवळ चवीलाच छान नसते, तर उष्माघातापासून शरीराचे रक्षण करण्यासाठी ते अत्यंत प्रभावी आहे.
लिंबू सरबत:
अत्यंत स्वस्त आणि मस्त असा पर्याय म्हणजे लिंबू सरबत. लिंबामुळे शरीराला व्हिटॅमिन सी मिळते आणि साखर-मीठामुळे शरीरातील ग्लुकोजची पातळी टिकून राहते. दुपारच्या वेळी कामात असताना लिंबू सरबत घेतल्यास थकवा जाणवत नाही.
वाळ्याचे पाणी आणि कोकम सरबत
पिण्याच्या पाण्याच्या माठात ‘वाळा’ टाकून ते पाणी प्यावे. वाळा नैसर्गिकरित्या थंड असतो. तसेच कोकम सरबत पित्तशामक असून उन्हामुळे होणारी जळजळ कमी करण्यास मदत करते.
