राजेंद्रकुमार गुंड
माढा – माढा येथील नेत्र तपासणी व मोतीबिंदू शस्त्रक्रिया शिबिराचे उद्घाटन विधानसभेचे विरोधी पक्षनेते अजित पवार यांच्या पत्नी तथा बारामती येथील एन्व्हायरमेंटल फोरम ऑफ इंडियाच्या अध्यक्षा सुनेत्रा पवार यांच्या शुभहस्ते उद्या गुरुवारी (ता. ९) सकाळी १० वाजण्याच्या सुमारास होणार आहे. तर हा कार्यक्रम पोलीस अधीक्षक शिरीष सरदेशपांडे यांच्या अध्यक्षतेखाली होणार आहे. अशी माहिती बँकेचे उपाध्यक्ष अशोक लुणावत यांनी दिली आहे.
माढेश्वरी बँक सांस्कृतिक मंडळ व विठ्ठलराव शिंदे बहुउद्देशीय सांस्कृतिक मंडळ निमगाव (टें) यांच्या संयुक्त विद्यमाने खासदार शरदचंद्र पवार यांच्या वाढदिवसानिमित्त ९ ते १२ फेब्रुवारी या कालावधीत शिबिराचे आयोजन करण्यात आले आहे.
जागतिक कीर्तीचे नेत्ररोगतज्ञ पद्मश्री डॉ.तात्याराव लहाने व नेत्ररोगतज्ञ डॉ.रागिणी पारेख यांच्या सहकार्यातून ९ फेब्रुवारी रोजी सर्व रुग्णांची नेत्र तपासणी होणार आहे. तर १० व ११ फेब्रुवारी रोजी मोतीबिंदू शस्त्रक्रिया आणि १२ फेब्रुवारी रोजी समारोप होणार आहे. या कालावधीत रुग्णांची मोफत निवासाची व भोजनाची व्यवस्था केली जाणार आहे.
या शिबिरामध्ये २ हजारच्या आसपास लोकांच्या नेत्र तपासणी आणि ४०० ते ५०० रुग्णांच्या मोतीबिंदू शस्त्रक्रिया करण्याचे नियोजन आहे. तरी या नेत्र शिबिराचा लाभ गरजूंनी घ्यावा. असे आवाहन संयोजकांनी केले आहे.
यावेळी प्रमुख अतिथी म्हणून मुख्य कार्यकारी अधिकारी डॉ.दिलीप स्वामी, आमदार बबनराव शिंदे, आमदार संजय शिंदे, माजी आमदार धनाजीराव साठे, जिल्हा दूध संघाचे चेअरमन रणजितसिंह शिंदे, सभापती विक्रमसिंह शिंदे, कृषीभूषण सुनंदाताई शिंदे, प्रांताधिकारी ज्योती कदम,तहसीलदार राजेश चव्हाण, अधिष्ठाता डॉ.सुधीर देशमुख,वैद्यकीय अधीक्षक डॉ.सुनंदा रणदिवे,जिल्हा शल्य चिकित्सक डॉ.धनंजय पाटील, तालुका वैद्यकीय अधिकारी डॉ. शिवाजी थोरात,जिल्हा आरोग्य अधिकारी डॉ.सोनिया बागडे, डॉ.एकनाथ बोधले,डॉ.गणेश इंदुलकर सपोनी शाम बुवा, डॉ.रामचंद्र मोहिते, झुंजार भांगे,डॉ.नंदकुमार घोळवे आदी मान्यवर मोठ्या संख्येने उपस्थित राहणार आहेत.
