Daund News : दौंड, (पुणे) : संसाराची नुकतीच सुरुवात झालेली असताना, कुटुंब नियोजन शस्त्रक्रिया एका तरुणीच्या जीवावर बेतल्याची धक्कादायक घटना दौंड तालुक्यातील केडगाव येथे घडली आहे. शस्त्रक्रियेनंतर झालेल्या अतिरक्तस्रावामुळे रंजना बाबू केसकर (वय २२, रा. खोर, ता. दौंड) या विवाहितेचा दुर्दैवी मृत्यू झाला. या घटनेमुळे आरोग्य विभागाच्या कारभारावर गंभीर प्रश्नचिन्ह निर्माण झाले असून, दोषींवर कारवाई करण्याची मागणी होत आहे. Daund News
मिळालेल्या माहितीनुसार, केडगाव येथील प्राथमिक आरोग्य केंद्रात शनिवारी (दि. २५ एप्रिल) कुटुंब नियोजन शस्त्रक्रिया शिबिराचे आयोजन करण्यात आले होते. रंजना केसकर या सकाळी नऊच्या सुमारास शस्त्रक्रियेसाठी दाखल झाल्या. शस्त्रक्रिया पूर्ण झाल्यानंतर काही वेळातच त्यांना पोटात असह्य वेदना सुरू झाल्या आणि मोठ्या प्रमाणात रक्तस्राव होऊ लागला. Daund News
रंजना यांची प्रकृती चिंताजनक असल्याचे पाहून वैद्यकीय अधिकारी डॉ. नीलिमा लोखंडे यांनी त्यांना तातडीने कार्डियाक ॲम्ब्युलन्समधून पुणे येथील ससून रुग्णालयात हलविले. प्रवासात डॉ. लोखंडे स्वतः सोबत होत्या, मात्र रक्तदाब नियंत्रित न झाल्याने आणि रक्तस्राव न थांबल्याने ससूनमध्ये पोहोचण्यापूर्वीच रंजना यांची प्राणज्योत मालवली. Daund News
चिमुकलीचा पहिला वाढदिवस अन् आईची साथ सुटली
रंजना यांच्या निधनाने अवघ्या २२ व्या वर्षी दोन निरागस बालकांच्या डोक्यावरून मायेचे छत्र हरपले आहे. त्यांना दोन वर्षांचा मुलगा पियूष आणि एक वर्षाची मुलगी आरोही आहे. अत्यंत क्लेशदायक बाब म्हणजे, मंगळवारी चिमुकल्या आरोहीचा पहिला वाढदिवस होता. मुलीचा पहिला वाढदिवस साजरा करण्यापूर्वीच काळाने आईवर झडप घातल्याने खोर ग्रामस्थांच्या डोळ्यात पाणी आले आहे. Daund News
ग्रामस्थांचा संताप आणि कारवाईची मागणी
या घटनेनंतर खोर परिसरात प्रचंड संताप व्यक्त केला जात आहे. डॉक्टरांच्या हलगर्जीपणामुळेच रंजना यांचा बळी गेल्याचा आरोप नातेवाईकांनी केला आहे. या प्रकरणाची निष्पक्ष चौकशी करून दोषी डॉक्टर आणि कर्मचाऱ्यांवर तातडीने कठोर कायदेशीर कारवाई करावी, अशी मागणी ग्रामस्थांनी केली आहे. Daund News
