ठाणे : ठाणे महानगरपालीकेच्या कळवा मधील छत्रपती शिवाजी महाराज रुग्णालयात एका रात्रीत तब्बल १७ रूग्णांचा मृत्यू झाला आहे. या घटनेमुळे रुग्णांच्या नातेवाईकांमध्ये संतापाची लाट पसरली आहे. तर मुख्यमंत्री एकनाथ शिंदे यांच्या जिल्ह्यातच आरोग्यसेवेचा बोजवारा उडाल्यामुळे प्रचंड खळबळ उडाली आहे.
सिव्हील रुग्णालय बंद झाल्यापासून सर्व ठाणे जिल्ह्यातील रुग्ण कळवा मधील छत्रपती शिवाजी महाराज रुग्णालयात येत आहेत. त्यामुळे या ठिकाणी डॉक्टर आणि वैद्यकीय यंत्रणा कमी पडत असल्याची स्थिती आहे. तर १० तारखेला एकच दिवशी ५ जणांचा मृत्यू झाला होता.
त्यानंतर आमदार जितेंद्र आव्हाड आणि इतर पक्षांनी रुग्णालयात जाऊन रुग्णालयाची पाहणी केली होती. मात्र आता केवळ रात्री साडेदहा ते सकाळी साडेआठ या दरम्यान १७ जणांचा मृत्यू झाला आहे. यातील १३ रुग्ण हे आयसीयू मधील तर ४ रुग्ण जनरल वॉर्ड मधील असल्याची माहिती समोर आली आहे. तर या घटनेमुळे रुग्णांच्या नातेवाईकांमध्ये संतापाची लाट पसरली आहे.
दरम्यान, रुग्णालयातील प्रशासनाने या बातमीला दुजोरा दिला असून, काही रुग्ण प्रायव्हेट हॉस्पिटल मधून शेवटच्या क्षणी आल्याने, काही रुग्ण ८० पेक्षा जास्त वयाचे असल्याने मृत्यू झाल्याचे सांगण्यात आले आहे.
नातेवाईकांचे आरोप
शुक्रवारी याच रुग्णालयात उपचार न मिळाल्याने पाच रुग्णांचा मृत्यू झाला आहे. असा आरोप रुग्णांच्या नातेवाईकांनी केला होता. तसेच रुग्णांना तपसण्यासाठी डॉक्टर येत नसून रुग्णांना वेळेवर औषध दिले जात नसल्याचा आरोपही नातेवाईकांनी केला आहे.
