मुंबई: सलमान खान, कतरिना कैफ आणि इमरान हाश्मी स्टारर ‘टायगर 3’ (Tiger 3 )दिवाळीच्या मुहूर्तावर चित्रपटगृहांमध्ये प्रदर्शित झाला. या चित्रपटाला प्रेक्षकांचा उदंड प्रतिसाद मिळत आहे. या चित्रपटाने पहिल्याच दिवशी जबरदस्त कमाई केली आणि यावर्षीच्या ब्लॉकबस्टर ‘गदर 2’ ला मागे टाकले. ‘टायगर 3’ ने दुसऱ्या दिवशी रेकॉर्डब्रेक कलेक्शन केले आहे. चित्रपटाच्या कमाईत जबरदस्त वाढ पाहायला मिळाली. ‘टायगर 3’ ने ‘जवान’ आणि ‘गदर 2’ च्या दुसऱ्या दिवसाच्या कमाईला मागे टाकले आहे.
फिल्म बिझनेस ट्रॅकर सकनिल्कच्या अहवालानुसार, सलमान खान आणि कतरिना कैफ स्टारर ‘टायगर 3’ च्या दुसऱ्या दिवसाच्या बॉक्स ऑफिस कलेक्शनमध्ये किमान 30 टक्क्यांनी वाढ झाली आहे. या चित्रपटाने पहिल्या दिवशी 44.5 कोटींची कमाई केली होती. तर दुसऱ्या दिवशी ‘टायगर 3’च्या कलेक्शनमध्ये चांगलीच वाढ दिसून आली. या चित्रपटाने भारतात 57.50 कोटी रुपयांची कमाई केली.
‘टायगर 3’ ने तोडले ‘जवान’ आणि ‘गदर 2’चे रेकॉर्ड
दुसऱ्या दिवशी एवढी कमाई करणारा सलमान खानचा ‘टायगर 3’ (Tiger 3 ) हा पहिला हिंदी चित्रपट ठरला आहे. ‘टायगर 3’ ने शाहरुख खान आणि नयनताराच्या ‘जवान’ (53.23 कोटी) आणि सनी देओलच्या ‘गदर 2’च्या (43.08 कोटी) दुसऱ्या दिवसाच्या कलेक्शनला मागे टाकले आहे. ‘टायगर 3’ ने दोन दिवसांत 102 कोटींची कमाई केली आहे.
भाऊबीजेला टायगर 3 चे कलेक्शन वाढण्याची अपेक्षा
लोक दिवाळी उत्सवात व्यस्त असल्यामुळे ‘टायगर 3’ च्या दुसऱ्या दिवसाची सुरुवात पहिल्या दिवसाच्या तुलनेत संथ झाली होती, परंतु, प्रचंड स्पॉट बुकिंगमुळे दुपारच्या शोमध्ये मोठी वर्दळ होती. गोवर्धन पूजा आणि भाऊबीजेमुले चित्रपटाच्या कलेक्शनमध्ये आणखी वाढ होऊ शकते. या चित्रपटाची प्रेक्षकांमध्ये प्रचंड क्रेझ पाहायला मिळत आहे.
‘टायगर 3’मध्ये शाहरुख खान आणि हृतिक रोशनचा कॅमिओ
‘टायगर 3’ चे दिग्दर्शन मनीष शर्मा यांनी केले आहे. हा चित्रपट टायगर फ्रँचायझीचा तिसरा आणि यशराज फिल्म्स स्पाय युनिव्हर्सचा पाचवा चित्रपट आहे. या स्पाय थ्रिलरमध्ये शाहरुख खानचा अॅक्शन-पॅक कॅमिओ प्रेक्षकांना खूप आवडला आहे. या चित्रपटात हृतिक रोशनचाही एक कॅमिओ आहे. दोन्ही स्टार्सच्या कॅमिओ सीन्सचे व्हिडिओही व्हायरल होत आहेत.
