मुंबई : संजय जाधव दिग्दर्शित ‘पुन्हा दुनियादारी’ लवकरच प्रेक्षकांच्या भेटीला येणार आहे. अंकुश चौधरी, स्वप्नील जोशी आणि सई ताम्हणकर यांची मैत्री ‘दुनियादारी’ या चित्रपटात पाहायला मिळाली होती. आता पुन्हा एकदा हे तिघे एकत्र येणार आहेत. यांच्यातील मैत्रीचा संगम पुन्हा एकदा अनुभवता येणार आहे.
‘पुन्हा दुनियादारी’ चित्रपटाची पूर्वतयारी आता सुरु झाली असून ही टीम प्रेक्षकांना तब्बल 11 वर्षांनंतर भेटीस येणार आहे. या नव्या चित्रपटाचे दिग्दर्शक संजय जाधव आहेत. तर या सिनेमाचे निर्माते स्वाती खोपकर, अमेय खोपकर, नानूभाई जयसिंघानी आणि निनाद बत्तीन आहेत. प्रेक्षकांमध्ये चित्रपटाबाबत उत्सुकता शिगेला पोहोचली आहे. सर्वजण चित्रपटाविषयी जाणून घेण्यासाठी उत्सुक झाले आहेत.
दिल दोस्ती दुनियादारी म्हणत कॉलेजच्या विद्यार्थ्यांबरोबरच समस्त महाराष्ट्राच्या पसंतीस उतरलेला चित्रपट म्हणजे दुनियादारी. या चित्रपटातील श्रेयस-दिग्याची जिगरी दोस्ती, बोल्ड शिरीन आणि चॉकलेट बॉय श्रेयसची लव्ह स्टोरी, जितेंद्र जोशीने वठवलेला साई नावाचा व्हिलन असो किंवा श्रेयसवर प्रेम करणारी भोळी मिनू असेल आजही ही सर्व पात्र प्रेक्षकांच्या मनात घर करुन आहेत.
या सुपरहिट चित्रपटाच्या तब्बल 10 वर्षानंतर दिग्दर्शन संजय जाधव ‘पुन्हा दुनियादारी’ हा नवा चित्रपट घेवून येत आहेत. आजही हा सिनेमा प्रेक्षकांच्या तितकाच पसंतीस उतरतो. त्यामुळे रसिक प्रेक्षकांसाठी हा सिनेमा पुन्हा एकदा सिनेमागृहात रिलीज होण्यासाठी सज्ज झाला आहे. पुन्हा एकदा तीच दुनियादारी दिग्दर्शक संजय जाधव यांच्या वेगळ्या अंदाजात प्रेक्षकांना अनुभवायला मिळणार आहे.
