सांगली : बॉलिवूडमधील संगीतकार व दिग्दर्शक पलाश मुच्छल यांच्यावर आर्थिक फसवणुकीचे गंभीर आरोप करण्यात आले आहेत. भारतीय महिला क्रिकेटपटू स्मृती मंधानाचा बालमित्र असलेल्या विज्ञान माने यांनी पलाश मुच्छल यांच्याविरोधात 40 लाख रुपयांच्या फसवणुकीची तक्रार सांगली जिल्हा पोलीस अधीक्षक कार्यालयात दाखल केली आहे.
विज्ञान माने हे मराठी चित्रपटसृष्टीशी संबंधित असून त्यांनी काही चित्रपटांसाठी फायनान्सर म्हणून काम केल्याची माहिती आहे. माने आणि पलाश मुच्छल यांची ओळख स्मृती मंधानाच्या कुटुंबीयांमार्फत झाली होती. या ओळखीच्या माध्यमातून पलाश यांनी त्यांच्या आगामी ‘नजरिया’ या चित्रपटासाठी गुंतवणुकीची मागणी केल्याचे तक्रारीत नमूद करण्यात आले आहे.
तक्रारीनुसार, चित्रपट पूर्ण होऊन ओटीटी प्लॅटफॉर्मवर प्रदर्शित झाल्यानंतर गुंतवणूकदारांना रक्कम परत केली जाईल, असे आश्वासन पलाश यांनी दिले होते. मात्र, चित्रपटाचे काम पूर्ण झाले नाही आणि गुंतवलेली रक्कमही परत मिळाली नसल्याचा आरोप माने यांनी केला आहे. वारंवार पाठपुरावा करूनही समाधानकारक उत्तर मिळाले नाही. तसेच, सध्या पलाश यांच्याशी संपर्क साधता येत नसून, आपला मोबाईल क्रमांक ब्लॉक केल्याचा दावाही माने यांनी केला आहे.
या तक्रारीनंतर सांगली पोलिसांनी प्राथमिक चौकशी सुरू केली असून प्रकरणाची सत्यता तपासली जात आहे. दरम्यान, पलाश मुच्छल किंवा त्यांच्या टीमकडून या आरोपांवर अद्याप कोणतीही अधिकृत प्रतिक्रिया देण्यात आलेली नाही.
या प्रकरणामुळे पलाश मुच्छल आणि स्मृती मंधाना यांच्यातील नातेसंबंधांबाबत पूर्वी झालेल्या चर्चांनाही पुन्हा उजाळा मिळाला आहे. दोघांच्या 2025 मधील लग्नाच्या घोषणा नंतर रद्द झाल्याच्या बातम्या समोर आल्या होत्या. त्या वेळी दोघांनीही सोशल मीडियाच्या माध्यमातून वेगळे होण्याचा निर्णय जाहीर केला होता.
दरम्यान, आर्थिक फसवणुकीच्या या प्रकरणात पुढील कायदेशीर कारवाई काय होते, याकडे सर्वांचे लक्ष लागले आहे.
