महेश्वर: कुंभमेळ्यातील फोटोंमुळे रातोरात प्रसिद्धीच्या झोतात आलेली ‘व्हायरल गर्ल’ मोनालिसा आणि फरमान खान यांचा विवाह सध्या देशभर चर्चेचा आणि वादाचा विषय ठरला आहे. या प्रकरणाला सुरुवातीला ‘लव्ह जिहाद’चा रंग देण्यात आला होता, मात्र आता राष्ट्रीय अनुसूचित जमाती आयोगाच्या (NCST) तपासात एक धक्कादायक वास्तव समोर आले आहे. मोनालिसा लग्नाच्या वेळी अल्पवयीन होती आणि तिची कागदपत्रे बनावट असल्याचे सिद्ध झाल्याने तिचा पती फरमान खानच्या अडचणीत मोठी वाढ झाली आहे.
मोनालिसा आणि फरमान खान यांचा विवाह पार पडला. या विवाहासाठी केरळमध्ये नोंदणी करताना मोनालिसाचे वय 18 वर्षे असल्याचे जन्म प्रमाणपत्र सादर करण्यात आले होते. मात्र, ती अल्पवयीन असल्याचा दावा करत चौकशीची मागणी कुटुंबीयांनी केली होती.
NCST चे अध्यक्ष अंतरसिंग आर्य यांनी स्थापन केलेल्या तपास पथकाने तीन दिवसांत अहवाल सादर केला. या तपासात सरकारी रुग्णालयातील नोंदीनुसार, मोनालिसाचा जन्म 30 डिसेंबर 2009 चा आहे. याचा अर्थ लग्नाच्या दिवशी तिचे वय अवघे 16 वर्षे आणि 2 महिने होते. कायद्यानुसार ती अल्पवयीन असल्याचे स्पष्ट झाले आहे. दरम्यान, आता या प्रकरणी खरगोनच्या महेश्वर पोलीस ठाण्यात फरमान खानविरुद्ध ‘पोक्सो’ (POCSO) आणि अपहरणाचा गुन्हा दाखल करण्यात आला आहे.
