पुणे प्राईम न्यूज: मल्याळम चित्रपटसृष्टीतील प्रसिद्ध अभिनेते कुंद्रा जॉनी यांचे वयाच्या ७१ व्या वर्षी हृदयविकाराच्या झटक्याने निधन झाले. त्यांच्या निधनामुळे संपूर्ण चित्रपटसृष्टीवर शोककळा पसरली आहे. मीडिया रिपोर्ट्सनुसार, कुंद्रा जॉनी यांना मंगळवारी संध्याकाळी हृदयविकाराचा झटका आला. त्यांना तात्काळ रुग्णालयात भरती करण्यात आले होते. डॉक्टरांनी त्यांना वाचवण्याचा आटोकाट प्रयत्न केला, मात्र त्यांना त्यात यश आले नाही.
FEFKA डायरेक्टर्स युनियनने फेसबुक पोस्ट शेअर करुन कुंद्रा जॉनी यांना श्रद्धांजली वाहिली आहे. तसेच पीटीआयनं दिलेल्या माहितीनुसार, कुंद्रा जॉनी यांच्या निधनानंतर केरळचे अर्थमंत्री के.एन. बालगोपाल यांनी शोक व्यक्त केला. ते म्हणाले, “कुंद्रा जॉनी यांनी चार दशकांहून अधिक काळातील त्यांच्या कारकिर्दीत 500 हून अधिक चित्रपटांमध्ये काम केले आहे.” कुंद्रा जॉनी यांच्या निधनानंतर मल्याळम चित्रपटसृष्टीत शोककळा पसरली आहे. अनेक सेलिब्रिटी आणि चाहते शोक व्यक्त करत आहेत.
