पुणे : अनेक वर्षांच्या अंतानंतर चित्रपटसृष्टीत पुनरागमन करण्याच्या तयारीत असलेला अभिनेता इम्रान खान सध्या एका मोठ्या कायदेशीर अडचणीत सापडला आहे. मुंबई पोलिसांनी त्याला 28 ऑक्टोबरपर्यंत भारत सोडण्याचे निर्देश देत ‘लिव्ह इंडिया’ नोटीस बजावली आहे.
मुंबईत मुख्य निवडणूक आयुक्तांच्या विरोधात झालेल्या एका राजकीय आंदोलनात इम्रान खान सहभागी झाला होता. या निदर्शनांदरम्यान त्याला पोलिसांनी ताब्यात घेतले होते. तो भारतीय नागरिक नसून अमेरिकेचा नागरिक आहे, आणि परदेशी नागरिक असूनही अशा स्थानिक आंदोलनात सहभागी झाल्यामुळे इमिग्रेशन कायद्यांतर्गत त्याच्यावर ही कठोर कारवाई करण्यात आली आहे.
इम्रानने 2008 मधील ‘जाने तू… या जाने ना’ सह अनेक रोमँटिक आणि विनोदी चित्रपटांत काम करत प्रेक्षकांच्या मनात वेगळे स्थान निर्माण केले. सन 2015 मधील ‘कट्टी बट्टी’ चित्रपटानंतर तो मोठ्या पडद्यापासून पूर्णपणे लांब होता. मात्र, काही महिन्यांपूर्वीच त्याने नेटफ्लिक्सच्या एका आगामी रोमँटिक कॉमेडी चित्रपटाचे शूटिंग पूर्ण केल्याची घोषणा केली होती. हा चित्रपट या वर्षाच्या अखेरीस प्रदर्शित होणार होता.
आता अचानक आलेल्या या देश सोडण्याच्या नोटीशीमुळे त्याच्या या बहुप्रतिक्षित कमबॅकवर आणि आगामी चित्रपटाच्या प्रदर्शनावर अनिश्चिततेचे सावट दाटले आहे. या कायदेशीर घडामोडींमुळे चाहत्यांमध्ये चिंतेचे वातावरण निर्माण झाले असून चित्रपटाचे भवितव्य काय असणार, याकडे सर्वांचे लक्ष लागले आहे.
