Film News : हिंदी, मराठी चित्रपटात आपल्या वेगळ्या प्रतिभेने प्रेक्षकांचे लक्ष वेधून घेणारी अभिनेत्री म्हणून सोनाली कुलकर्णी यांचे नाव घेतले जाते. कौटुंबिक नातेसंबंध असलेल्या चित्रपटांमध्ये त्यांनी आपली वेगळी व्यक्तिरेखा सादर केली आहे. आता नोव्हेंबर महिन्यात ‘शॉर्ट अँड स्वीट’ हा चित्रपट रिलीजसाठी सज्ज झाला आहे.
या चित्रपटात सोनाली कुलकर्णी जरा हटके अशा व्यक्तिरेखेत दिसणार आहे. नुकताच या चित्रपटाचा टिझर प्रदर्शित झाला आणि त्यात तिचे हे दिसलेले वेगळे रूप प्रेक्षकांमध्ये उत्सुकता निर्माण करणारे झाले आहे. शुभम प्रोडक्शन प्रस्तुत या चित्रपटाचे दिग्दर्शन गणेश कदम यांनी केले आहे. पायल गणेश कदम व विनोद राव हे या चित्रपटाचे निर्माते आहेत.
स्वप्नील बारस्कर यांनी लेखन असून, राहुल जाधव यांचे छायाचित्रण आहे. या चित्रपटात सोनाली कुलकर्णी, हर्षद अतकरी, श्रीधर वाटसर, रसिका सुनील या कलाकारांच्या प्रमुख भूमिका आहेत. याचबरोबर यूट्यूबर आणि रील विश्वातील तुषार खैर व कॉमेडी किंग ओमकार भोजणेही पाहायला मिळतील. मनोरंजनात्मक तसेच संवेदनशील असा हा चित्रपट लवकरच प्रेक्षकांच्या भेटीला येणार आहे.
