Pune News : खेड, (पुणे) : कंपन्यामधील व्यावसायिक वर्चस्वातून कनेरसर (ता. खेड) येथील ग्रामपंचायतीचा सदस्य असलेल्या एका ३५ वर्षीय तरुणाची हत्या झाल्याची घटना नुकतीच उघडकीस आली आहे. या घटनेनं परिसरात एकच खळबळ उडाली आहे.
३५ वर्षीय तरुणाची हत्या
संतोष रामदास दौंडकर (वय ३५, रा. कनेरसर, ता. खेड) असे हत्या झालेल्या ग्रामपंचायत सदस्याचे नाव आहे.
मिळालेल्या माहितीनुसार, संतोष दौंडकर यांनी क्रेनचा व्यवसाय सुरू केला होता. त्यामुळे अनेक कंपन्यामध्ये क्रेन पुरविण्याचे काम ते करत होते. खेड तालुक्यातील सेझ प्रकल्पाच्या दुसऱ्या टप्प्याचे काही प्रमाणात काम सुरू आहे. अत्यंत कमी कालावधीत त्यांनी व्यवसायात यश मिळवत व्यवसाय वाढवला होता.
संतोष हे शुक्रवारी (ता. ०६) सायंकाळच्या सुमारास कंपनीच्या गोडाऊनजवळ असताना अज्ञात हल्लेखोरांनी त्यांच्यावर धारदार हत्याराने वार केले. संतोष यांनी प्रतिकार करण्याचा प्रयत्न केला. मात्र, त्यांच्या हाताचा अंगठा तुटून पडला. हल्लेखोर हल्ला करतच होते. आपला बचाव करण्यासाठी पळत असताना हल्लेखोरांनी त्यांचा पाठलाग करत त्यांच्यावर वार केले.
दरम्यान,या घटनेने कंपन्यांमधील ठेकेदारी ही जीवघेणी स्पर्धा ठरत असल्याचं पाहायला मिळत आहे. या प्रकरणाचा पोलिसांकडून तपास सुरू करण्यात आला आहे. या घटनेनं परिसरातील नागरिकांनी घटनास्थळी मोठी गर्दी केली होती. चार वर्षांपूर्वी अशाच प्रकारची हत्येची घटना घडली होती. आज पुन्हा त्याचीच पुनरावृत्ती झाल्याचे पाहायला मिळालं आहे.
