Bobby Deol : मुंबई : अॅनिमल चित्रपटानं मोठी क्रेझ तयार केली आहे. आज प्रदर्शित झालेल्या या चित्रपटाला प्रेक्षकांची मोठी पसंती मिळत आहे. रणबीर कपूर या चित्रपटामध्ये मुख्य भूमिकेत असला तरी त्याच्या जोडीनं बॉबी देओलच्या भूमिकेचे कौतुक होत आहे. सध्या चित्रपटाचे मीम्स, फोटो आणि व्हिडिओ व्हायरल होत आहे. त्यात नेटकऱ्यांनी बॉबीची मुक्तकंठानं प्रशंसा केली आहे.
अॅनिमलमध्ये रणबीर कमाल आहेच पण बॉबीही काही कमी नाही. त्याच्या एंट्रीनं अॅनिमलची रंगत आणखी वाढवली आहे. रणबीरपेक्षा जास्त कौतुक बॉबीच्या वाट्याला आलं आहे. गेल्या दोन-तीन वर्षात बॉबीच्या करिअरनं मोठी झेप घेतल्याचे दिसून आले आहे. करिअरच्या एका काळात पूर्णपणे डी फोकस झालेल्या बॉबीला पुन्हा एकदा मुख्य प्रवाहात आणण्याचं काम बॉलीवूडचा भाईजान सलमान खाननं केलं होतं. हे बॉबीनं अनेक मुलाखतीतून सांगितलं आहे.
प्रकाश झा यांच्या आश्रम वेब सिरीजमधून बॉबीला प्रचंड लोकप्रियता मिळाली होती. बॉलीवूडमधील कित्येक समीक्षकांच्या मते हा सिनेमा बॉबीच्या करिअरसाठी महत्वाची भूमिका बजावणारा ठरला यात शंका नाही. १९९५ मध्ये बरसात फिल्ममधून डेब्यू करणाऱ्या बॉबीच्या करिअरचा ग्राफ हा नेहमीच चढता-उतरता राहिला आहे. २००२ मध्ये त्याचे करिअर स्थिर होते. त्यानंतर मात्र त्यानं वेगळे वळण घेतल्याचे दिसून आले. बॉबीच्या करिअरमधील पाच वर्षे अशी होती की त्यामुळे तो पूर्णपणे निराश झाला होता. त्याच्याकडे कोणतेही प्रोजेक्ट नव्हते, मालिका अथवा जाहिरातीही नव्हत्या. अशावेळी त्याला सलमानचा मोठा आधार मिळाला.
