मुंबई : साउथ सिनेमाचा सुपरस्टार महेश बाबू यांच्या आई इंदिरा देवी (वय-७०) यांचे आज बुधवारी (ता.२८) निधन झाले आहे. त्यांच्या निधनामुळे चित्रपटसृष्टीत शोककळा पसरली आहे.
इंदिरा देवी या अनेक आजारांनी त्रस्त होत्या. त्यांना रुग्णालयात दाखल करण्यात आले होते. पण उपचारा दरम्यान त्यांनी आज अखेरचा श्वास घेतला. ज्येष्ठ अभिनेते कृष्णा यांच्या पत्नी आणि महेश बाबू यांच्या आई इंदिरा देवी यांचे निधन झाल्यामुळे कलाविश्वात मोठी पोकळी निर्माण झाली आहे. महेश दिग्गज अभिनेते कृष्णा आणि इंदिरा देवी यांच्या पाच मुलांपैकी चौथे आहेत.
दरम्यान, इंदिरा देवी यांचे पार्थिव अंतिम दर्शनासाठी सकाळी ९ ते दुपारी १२ वाजेपर्यंत पद्मालय स्टुडिओमध्ये ठेवण्यात येणार आहे. बुधवारी दुपारी १ वाजता महाप्रस्थानम येथे त्यांच्या पार्थिवावर अंत्यसंस्कार करण्यात येणार आहेत.
