मुंबई: अभिनेत्री उर्वशी रौतेलाने २५ फेब्रुवारी रोजी २५वा वाढदिवस साजरा केला. उर्वशी तिच्या बॉलिवूडमधील कारकिर्दीपेक्षा जास्त इतर गोष्टींमुळे चर्चेत असते. आताही अभिनेत्री तिच्या वाढदिवशी एक खूपच खास केक कापल्यामुळे चर्चेत आली आहे. अभिनेत्रीसोबत तिच्या या सेलिब्रेशनमध्ये रॅपर यो यो हनी सिंगही सहभागी झाला आहे.
अभिनेत्री उर्वशी रौतेलाने ‘लव्हडोस २’च्या सेटवरुन तिच्या वाढदिवसाच्या पार्टीचे काही फोटो आणि व्हिडिओ शेअर केले आहेत. ज्यात ती एक भलामोठा सोन्याचा केक कापताना दिसली. दरम्यान हा केक साधासुधा नसून चक्क सोन्याचा असल्याचे उर्वशीने स्वत: पोस्ट करत सांगितले. तिने वाढदिवसानिमित्त केलेल्या प्रत्येक पोस्टमध्ये हा स्पेशल केक पाहायला मिळतो आहे.
अभिनेत्रीने जी पोस्ट शेअर केली आहे. त्यात तिने हनी सिंग आणि तिच्या टीमचे आभार मानले. ज्यात ती सोन्याच्या केकसह पोज देऊन उभी आहे. अभिनेत्रीने कॅप्शनमध्ये असे म्हटले आहे की, हा केक २४ कॅरेटच्या खऱ्या सोन्याचा आहे. अभिनेत्रीला असा केक कापताना पाहून तिच्या चाहत्यांनाही आश्चर्य वाटलं. त्यामध्ये अभिनेत्रीपेक्षा तिने कापलेल्या सोन्याच्या केकने सर्वाधिक लक्ष वेधून घेतले.
वाढदिवशी उर्वशीने एक पोस्ट हनी सिंगसोबतही केली आहे. अभिनेत्रीचे करिअर सुरू होण्यात हनी सिंगचा मोठा वाटा असल्याने तिने एक लांबलचक पोस्ट करत त्याचे आभार मानले. हनी सिंगच्या ‘लव्हडोस’ गाण्यात उर्वशीच मुख्य भूमिकेत होती. आता या गाण्याचा सीक्वेल येत असून, त्यामध्येही उर्वशीच दिसणार आहे. या गाण्याच्या शूटिंग सेटवर अशाप्रकारे दणक्यात तिचा वाढदिवस साजरा झाला. उर्वशीने वाढदिवशी केलेल्या या सर्वच पोस्ट चर्चेत आल्या आहेत. सोशल मीडियावर अभिनेत्रीचे हे ‘सोनेरी’ सेलिब्रेशन चांगलेच व्हायरल झाले आहे.
