पुणे : शालेय विद्यार्थिनी खास “सॅनिटरी नॅपकिन बँक, आपल्या आरोग्यासाठी” हा उपक्रम संपूर्ण राज्यात राबविण्यासाठी प्रयत्न करणार आहे. असे प्रतिपादन राज्य महिला आयोगाच्या अध्यक्ष रूपाली चाकणकर यांनी केले आहे.
राज्याच्या महिला आयोगाच्या अध्यक्षा रूपाली चाकणकर यांनी शालेय विद्यार्थिनींसाठी एक नवा उपक्रम सुरू केला आहे. यामध्ये विद्यार्थिनींना सॅनिटरी नॅपकिन दिले जाणार असून गुड टच आणि बॅड टचचे प्रशिक्षण दिले जाणार आहे. या उपक्रमाला पुणे येथून प्रारंभ झाला असून पहिल्याच दिवशी १८०० विद्यार्थिनींनी सहभाग घेतला आहे. हा विशेष उपक्रम महाराष्ट्र राज्य महिला आयोग आणि क्रांतीज्योत महिला प्रतिष्ठान, धायरी यांच्या संयुक्त विद्यमाने राबविण्यात आला होता.
पुढे बोलताना चाकणकर म्हणाल्या , शालेय विद्यार्थिनींना गुड टच आणि बॅड टचचे प्रशिक्षण देखील दिले जात आहे. या प्रशिक्षणानंतर दरमहिन्याला सॅनिटरी पॅडचे वाटप होणार आहे. या उप्रक्रमा दरम्यान शाळा – कॉलेज यांच्याशी समन्वय ठेवला जात आहे. प्रत्येक विद्यार्थिनीची नोंद करून तिला ओळखपत्र दिले जात आहे. त्यानंतर दर महिन्याला ओळख पत्र दाखवत, नोंद करुन घेत शाळा-महाविद्यालयातच विद्यार्थिनींना सॅनिटरी पॅड वाटप होणार आहे.
दरम्यान, पुणे येथे झालेल्या कार्यक्रमात सॅनिटरी नॅपकीन बॅंकसाठी नोंदणी संदर्भात आणि मुलींना गुड टच-बॅड टचचे धडे देण्यात आले आहे. यावेळी उपस्थित डॅाक्टरांच्या टीमकडून मुलींना सॅनिटरी नॅपकिनचा वापर, चांगले आरोग्य राखण्यासाठी काय काळजी घ्यावी याबाबत मार्गदर्शन देखील करण्यात आले.
