पुणे : नॅशनल टेस्टिंग एजन्सीमार्फत नुकतीच घेण्यात आलेली जेईई मेन्स परीक्षेची सत्र २ च्या पेपर भाग १ ची अंतिम उत्तरसूची संकेतस्थळावर प्रसिद्ध करण्यात आली आहे. जेईई मेन २०२४ च्या दुसऱ्या सत्रात पेपर १ च्या परीक्षा ४, ५, ६, ८ आणि ९ एप्रिल रोजी घेण्यात आल्या होत्या. यानंतर, एजन्सीने १२ एप्रिल रोजी उमेदवारांची तात्पुरती उत्तरसूची आणि उत्तरपत्रिका प्रसिद्ध केली आणि दि. १४ एप्रिलपर्यंत उमेदवारांकडून हरकती मागवल्या.
या आक्षेपांचे पुनरावलोकन केल्यानंतर एनटीएने आता अंतिम उत्तरसूची प्रसिद्ध केली आहे. जेईई मेन एप्रिल २०२४ पेपर भाग १ ची अंतिम उत्तरसूची प्रसिद्ध केल्यानंतर आता निकाल जाहीर केले जातील. एजन्सीने निकाल प्रसिद्ध करण्याची तारीख जाहीर केलेली नाही. तथापि, अंतिम उत्तरसूची प्रसिद्ध झाल्यानंतर एनटीए जेईईचा मुख्य निकाल एक ते दोन दिवसांत जाहीर करण्याची शक्यता आहे.
