लोणी काळभोर : शासकीय चित्रकला ग्रेड परीक्षेत लोणी काळभोर (ता. हवेली) येथील पृथ्वीराज कपूर मेमोरियल हायस्कूल व ज्युनिअर कॉलेजच्या विद्यार्थ्यांनी घवघवीत यश संपादन केले आहे. या परीक्षेत विद्यालयाचा १०० टक्के निकाल लागला आहे, अशी माहिती विद्यालयाचे प्राचार्य सीताराम गवळी यांनी दिली.
शासकीय चित्रकला ग्रेड परीक्षेचा निकाल गुरुवारी (ता.१९) लागला आहे. या परीक्षेत विद्यालयातील एलिमेंटरीसाठी ४० तर इंटरमिजिएटसाठी ८ असे एकूण ४८ विद्यार्थी बसले होते. या परीक्षेत सर्व परीक्षार्थी उत्तीर्ण झाले आहे. यशस्वी विद्यार्थ्यांना कलाशिक्षक पराग होलमुखे यांचे मार्गदर्शन मिळाले.
या परीक्षेत एलिमेंटरी विद्यार्थी ४० विद्यार्थी बसले होते. यांमध्ये एका विद्यार्थ्याला अ श्रेणी, ४ विद्यार्थ्यांना ब श्रेणी आणि ३५ विद्यार्थ्यांना क श्रेणी मिळाली आहे. तर इंटरमिजिएटसाठी ८ विद्यार्थी बसले होते. त्यातील एका विद्यार्थ्याला अ श्रेणी, २ विद्यार्थ्यांना ब श्रेणी आणि ५ विद्यार्थ्यांना क श्रेणी मिळाली आहे. ज्या विद्यार्थ्यांना ए,बी व सी ग्रेड मिळाली आहे. अशा विद्यार्थ्यांना इयत्ता दहावीच्या गुणपत्रिकेत अनुक्रमे सात, पाच, व तीन अशा प्रकारे गुण वाढवून मिळणार आहेत.
दरम्यान, यशस्वी विद्यार्थ्यांवर लोणी काळभोर परिसरातील नागरिकांकडून कौतुकाचा वर्षाव होत आहे. तसेच यशस्वी विद्यार्थी व शिक्षकांचे प्राचार्य एस.एम. गवळी यांनी अभिनंदन करून पुढील वाटचालीसाठी शुभेच्छा दिल्या आहेत.
