नवी दिल्ली: देशात जीएसटी संकलनाबाबत मोठी बातमी समोर आली आहे. लागू झाल्यापासून सरकारी तिजोरीत सतत वाढ होताना दिसून येत आहे. आता सरकारने जीएसटी संकलनात एक मोठा विक्रम केला आहे. विशेष म्हणजे गेल्या 5 वर्षांत सरकारचे जीएसटी संकलन दुप्पट झाले आहे. जाणकारांच्या मते, येणाऱ्या काळात जीएसटी संकलनात आणखी भर पडू शकते.
2024-25 मध्ये 22.08 लाख कोटी रुपयांचा उच्चांक
देशाच्या अर्थव्यवस्थेसाठी मोठी दिलासादायक बातमी समोर आली आहे. वस्तू आणि सेवा कर प्रणाली (GST) लागू झाल्यानंतरच्या कालावधीत वर्ष 2024-25 मध्ये सरकारने विक्रमी GST संकलन नोंदवले आहे. विशेष म्हणजे, पाच वर्षांत GST संकलन जवळपास दुप्पट झाले असून, यंदाच्या आर्थिक वर्षात 22.08 लाख कोटी रुपयांचा उच्चांक गाठण्यात सरकारला यश आले आहे.
GST प्रणाली अंमलात आल्यानंतर आर्थिक वर्ष 2020-21 मध्ये 11.37 लाख कोटी रुपयांचे संकलन झाले होते. मात्र यंदा, 2024-25 मध्ये हेच संकलन तब्बल 22.08 लाख कोटी रुपयांवर पोहोचले असून, मागील वर्षाच्या तुलनेत 9.4% वाढ नोंदवली आहे.
विशेष म्हणजे पाच वर्षांत वार्षिक आधारावर हे संकलन जवळजवळ दुप्पट झाले आहे. आर्थिक वर्ष 2024-25 मध्ये सरासरी मासिक संकलन 1.84 लाख कोटी रुपये होते, जे 2023-24 मध्ये 1.68 लाख कोटी रुपये आणि 2021-22 मध्ये 1.51 लाख कोटी रुपये होते. तज्ञांच्या मते, येत्या काळात हे मासिक सरासरी संकलन 2 लाख कोटी रुपयांच्या आसपास जाऊ शकते.
नोंदणीकृत करदात्यांची संख्याही दुप्पट झाली
GST प्रणाली 2017 मध्ये लागू झाल्यानंतर तेव्हाच्या 65 लाख नोंदणीकृत करदात्यांची संख्या आता 1.51 कोटींहून अधिक झाली आहे. यामुळे करदात्यांचे जाळे विस्तारले असून, अप्रत्यक्ष कर संकलन अधिक पारदर्शक आणि कार्यक्षम झाले आहे.
