पुणे : पॉक्सो व बलात्काराचा गुन्हा असलेल्या व तब्बल २ वर्षापासून फरार असलेल्या आरोपीला चंदननगर पोलिसांनी पुणे स्टेशन परिसरातून अटक केली आहे.
सोन्या उर्फ स्वप्निल नागनाथ कांबळे (वय-२३ रा. शिवतेज नगर, हिंजवडी) असे अटक केलेल्या आरोपीचे नाव आहे.
पोलिसांनी दिलेल्या माहितीनुसार, आरोपी सोन्या उर्फ स्वप्निल कांबळे याच्या विरुद्ध चंदननगर पोलीस ठाण्यात पॉक्सो आणि बलात्काराचा गुन्हा सन २०२१ मध्ये दाखल करण्यात आला होता. गुन्हा दाखल झाल्यानंतर आरोपी ओडिसा येथे पळून गेला. पोलीस आरोपीचा शोध घेत होता. मात्र तो चकवा देत होता. सदर गुन्ह्याचा तपास करीत असताना, आरोपी रेल्वेने पुण्यात येणार अशी माहिती पोलिसांना एका खबऱ्यामार्फत मिळाली.
मिळालेल्या माहितीनुसार पोलिसांनी पुणे स्टेशन परिसरात सापळा रचला. पोलिसांनी मोठ्या शिताफीने कांबळेला ताब्यात घेतले असून पुढील तपास सहायक पोलीस निरीक्षक भगवान कांबळे करत आहेत.
ही कामगिरी चंदननगर पोलीस ठाण्याचे प्रभारी अधिकारी राजेंद्र लांडगे, पोलीस निरीक्षक गुन्हे जगन्नाथ जानकर यांच्या मार्गदर्शनाखाली सहायक पोलीस निरीक्षक निलेश घोरपडे, पोलीस अंमलदार श्रीकांत शेंडे, श्रीकांत कोद्रे, सुरज जाधव, शेखर शिंदे, गणेश हांडगर आणि शिवाजी धांडे यांच्या पथकाने केली.
