Loni Kalbhor : लोणी काळभोर, (पुणे) : कदमवाकवस्ती (ता. हवेली) परिसरात चोरट्यांचा अक्षरशः धुमाकूळ सुरू असल्याचे चित्र समोर आले असून, अल्पावधीतच दोन वेगवेगळ्या ठिकाणी घडलेल्या चोरीच्या घटनांनी नागरिकांची झोप उडवली आहे. भरगर्दीच्या लग्नसमारंभात गळ्यातील सोन्याची चैन लंपास करण्यात आली, तर दुसऱ्या घटनेत हॉटेलच्या पार्किंगमधून दुचाकी चोरीस गेल्याने कायदा व सुव्यवस्थेवर प्रश्नचिन्ह उपस्थित झाले आहे. Loni Kalbhor
पहिल्या घटनेत, कुंडलीक रंगनाथ गाडे (वय 65, रा. गणराज पार्क, कवडीपाट) हे रविवारी (दि. 26 एप्रिल) मित्राच्या मुलीच्या लग्नासाठी गुलमोहर लॉन्स येथे उपस्थित होते. रात्री सुमारे 8.15 ते 8.30 वाजण्याच्या दरम्यान जेवणाच्या काउंटरवर मोठी गर्दी असताना अज्ञात चोरट्याने त्यांच्या गळ्यातील चालू बाजारभावानुसार सुमारे साडेतीन लाख रुपयांहून अधिक किमतीची, 25 ग्रॅम वजनाची पिळेदार सोन्याची चैन आणि ‘ओम’ नक्षी असलेले पेंडन्ट चोरून नेले. घटनेनंतर लग्नस्थळी घोषणा करूनही कोणताही मागोवा लागला नाही. Loni Kalbhor
दुसऱ्या घटनेत, विजय रामचंद्र खरात (वय 49, रा. महादेव नगर, हडपसर) यांची हिरो होंडा स्प्लेंडर (क्र. MH 12 FL 5850) ही दुचाकी चोरीस गेली. ते सितारा हॉटेल, कवडीपाट येथे मॅनेजर म्हणून कार्यरत असून, 21 एप्रिल रोजी दुपारी त्यांनी आपली दुचाकी हॉटेलच्या पार्किंगमध्ये उभी केली होती. मात्र, 22 एप्रिल रोजी मध्यरात्री काम आटोपून परतल्यावर गाडी गायब झाल्याचे निदर्शनास आले. परिसरात शोध घेऊनही काहीच निष्पन्न न झाल्याने त्यांनी लोणी काळभोर पोलीस ठाण्यात तक्रार दाखल केली. Loni Kalbhor
या दोन्ही घटनांमुळे परिसरात भीतीचे वातावरण पसरले असून, “चोरट्यांना पोलिसांचा धाक उरला आहे का?” असा सवाल नागरिकांकडून उपस्थित केला जात आहे. वारंवार घडणाऱ्या चोरीच्या घटनांमुळे नागरिकांमध्ये तीव्र संताप व्यक्त होत आहे. पोलिसांनी या घटनांचा सखोल तपास करून चोरट्यांना तातडीने अटक करावी, तसेच परिसरात गस्त वाढवून अशा प्रकारांना आळा घालावा, अशी जोरदार मागणी स्थानिक नागरिकांकडून केली जात आहे. Loni Kalbhor
