Wagholi Accident वाघोली, (पुणे) : बकोरी- केसनंद रोडवर जोगेश्वरी मंदिरासमोर दोन चारचाकी गाड्यांची समोरासमोर झालेल्या धडकेत केसनंद येथील एका तरुणाचा मृत्यू झाला आहे. तर चार जण गंभीर जखमी झाले आहेत. शुक्रवारी (ता. २८) रात्री साडेआठ वाजण्याच्या सुमारास ही घटना घडली.
मयुर भाऊसो बहिरट ( रा. केसनंद, ता. हवेली ) असे अपघातात मृत्युमुखी पडलेल्या तरुणाचे नाव आहे. तर योगेश केरदळे, सर्जेराव माने, किरण गावडे व अजय जाधव असे जखमी झालेल्या चौघांची नावे आहेत. याप्रकरणी अजय जाधव यांनी फिर्याद दिली.
पोलिसांनी दिलेल्या माहितीनुसार…!
मयूर हा कार घेऊन केसनंदकडे जात होता. तर चौघेजण त्यांच्या कारमधून पुण्याकडे येत होते. दोन्ही कारची समोरासमोर धडक झाली. यामध्ये मयूर हा गंभीर जखमी झाल्याने त्याचा मृत्यू झाला. तर दुसऱ्या कारमधील चौघे जण गंभीर जखमी झाले.
दरम्यान, बुधवारी दुपारी वाघोलीत केसनंद फाट्यावर डंपरच्या धडकेने दुचाकीवरील काळे दाम्पत्याचा जागीच मृत्यू झाला. तर शुक्रवारी रात्री या दोन कारचा अपघात होऊन एकाचा मृत्यू तर चार जण जखमी झाले आहेत. या घटनेने केसनंदसह परिसरात हळहळ व्यक्त केली जात आहे.
