पुणे : पुण्यातील वैष्णवी हगवणे प्रकरणात धक्कादायक खुलासे समोर येत आहेत. हुंड्यासाठी सासरच्या मंडळीकडून वारंवार होणाऱ्या मानसिक आणि शारीरिक छळाला कंटाळून वैष्णवीने 16 मे रोजी गळफास घेऊन आत्महत्या केली होती. या आत्महत्या प्रकरणाने सर्वत्र हळहळ व्यक्त केली जात आहे. त्यानंतर आता हगवणे पिता -पुत्रांचा माज दाखवणारा एक व्हिडिओ सध्या समाज माध्यमांवर तुफान व्हायरल होत आहे. या व्हिडिओमध्ये वैष्णवीचा सासरा राजेंद्र हगवणे आणि दीर सुशील हगवणे हे दिसत आहेत.
हगवणे पिता – पुत्रांच्या व्हायरल व्हिडिओत काय आहे?
लोक मला म्हणतात बापाच्या जीवावर हवा करतो, च्या@#₹% बाप माझा मी हवा करेल नाहीतर काही पण करेल तुमच्या बापात दम असेल तर तुम्ही पण करा…’ या डायलॉगसह सुशील हगवणे आणि राजेंद्र हगवणे यांचा एक व्हिडिओ सध्या समाज माध्यमांवर व्हायरल होत आहे. त्यामुळे हगवणेचा आणखी एक माजुरडेपणा समोर आला आहे. हा व्हिडीओ व्हायरल झाल्यानंतर सर्वत्र संताप व्यक्त केला जात आहे.
दरम्यान वैष्णवीच्या शवविच्छेदन अहवालात धक्कादायक बाबी समोर आल्या आहेत. तिच्या मृतदेहावर एकूण २९ जखमा आढळल्या असून, त्यापैकी १५ जखमा या तिच्या मृत्यूपूर्वीच्या २४ तासांतील असल्याचे शवविच्छेदन अहवालात निष्पन्न झाले आहे. उर्वरित जखमा मृत्यूपूर्वीच्या आठवडाभराच्या कालावधीतील आहेत. त्यामुळे तिला सातत्याने मारहाण होत असल्याचे निदर्शनास आले आहे. त्यामुळे वैष्णवीने गळफास घेण्यापूर्वी तिला सासरच्या मंडळीनी बेदम मारहाण केल्याची धक्कादायक बाब समोर आली आहे.
