पुणे : पुण्यातील वैष्णवी हगवणे आत्महत्येप्रकरणी गेल्या दहा दिवसापासून फरार असलेला आरोपी निलेश चव्हाण याला 30 मे रोजी पिंपरी चिंचवड पोलिसांनी नेपाळ सीमेवरून अटक केली. त्यानंतर आज बावधन पोलिसांनी शिवाजीनगर जिल्हा न्यायालयात न्यायाधीशांसमोर निलेश चव्हाणला हजर करून पोलीस कोठडीची मागणी केली. याबाबत न्यायालयात झालेल्या युक्तिवादानंतर निलेश चव्हाणला तीन जूनपर्यंत पोलीस कोठडी सुनावण्यात आली आहे.
याबाबत अधिक माहिती अशी की, पुण्यातील वैष्णवी हगवणे यांच्या बाळाची हेळसांड केल्याचा आरोप असणाऱ्या निलेश चव्हाण याला पोलीस कोठडी मिळाली आहे. त्याला ३ जूनपर्यंत पोलीस कोठडीत ठेवण्याचे आदेश शिवाजीनगर न्यायालयाने दिले. निलेश चव्हाण हा गेल्या नऊ दिवसांपासून फरार होता. त्याच्या शोधासाठी पोलिसांची सहा पथके रवाना झाली होती. अखेर शुक्रवारी त्याला नेपाळ सीमेजवळ अटक करण्यात आले. त्यानंतर विमानाने पुण्यात आणण्यात आले. त्याची वैद्यकीय चाचणी करण्यात आल्यावर शनिवारी सकाळी १० वाजता पुणे येथील शिवाजीनगर न्यायालयात आणले. यावेळी पोलिसांनी निलेश चव्हाण याला पाच दिवसांची पोलीस कोठडी द्यावी, अशी मागणी कोर्टात केली. न्यायालयाने दोन्ही बाजूंचा युक्तीवाद ऐकल्यानंतर ३ जूनपर्यंत पोलीस कोठडी दिली आहे.
निलेश चव्हाण यांच्याकडे वैष्णवी हगवणे यांचे बाळ कसे गेले? त्याचा तपास करायचा आहे. त्याचबरोबर त्याचा मोबाईल जप्त करायचा आहे. त्याचा ऑडिओ रेकॉर्ड करायचा आहे असे पोलिसांनी म्हटले आहे.तसेच कस्पटे कुटुंबियांना धमकवण्यासाठी त्याने बंदूक वापरली होती. ती बंदूक जप्त करायची आहे. निलेशकडे हगवणे कुटुंबियांचा मोबाईल आहे, तो मिळवायचा आहे. त्यामुळे पाच दिवसांची कोठडी देण्याची मागणी पोलिसांनी केली. मात्र, न्यायालयाने ३ जूनपर्यंत कोठडी दिली आहे.
