रायगड : शालेय क्रीडा स्पर्धेत स्पर्धकाने फेकलेला भाला डोक्यात घुसल्याने एका विद्यार्थ्याचा दुर्दैवी मृत्यू झाला. ही धक्कादायक घटना रायगड जिल्ह्यातील पुरार येथील एका शाळेत घडली. या घटनेने रायगड जिल्ह्यात एकच खळबळ उडाली.
हुजेफा डावरे असे यामध्ये मृत्युमुखी पडलेल्या विद्यार्थ्याचं नाव आहे. हा विद्यार्थी दहीवली कोंड येथील रहिवासी आहे. माणगाव तालुका माध्यमिक विभागाच्या वतीने या शालेय स्पर्धा आयोजित करण्यात आल्या होत्या. याच स्पर्धेदरम्यान भाला फेकचा खेळ सुरू होता. ही स्पर्धा पाहण्यासाठी हुजेफा डावरे देखील आला होता. खेळादरम्यान एका स्पर्धकाचा भाला विद्यार्थ्याच्या डोक्यात घुसला. त्यामुळे संबंधित विद्यार्थ्याचा मृत्यू झाला.
दरम्यान, डोक्यात भाला घुसल्याने विद्यार्थ्याचा मृत्यू झाला. या घटनेने स्पर्धेच्या ठिकाणी एकच खळबळ उडाली. या प्रकाराची माहिती पोलिसांनाही देण्यात आली. त्यानुसार, गोरेगाव पोलिसांनी अकस्मात मृत्यूची नोंद केली आहे.
