पुणे : भरधाव ट्रकच्या धडकेने दुचाकीस्वार तरुणाचा मृत्यू झाल्याची घटना महापालिका भवन परिसरात नुकतीच घडली होती. शिवाजीनगर पोलिसांनी तब्बल २५० सीसीटीव्ही कॅमेऱ्यांचे चित्रीकरण तपासून पसार झालेल्या ट्रकचालकाला पकडले.
ख्वाजामिया मस्तानमिया खान (वय २६, रा. बिदर, कर्नाटक) असे अटक करण्यात आलेल्या ट्रकचालकाचे नाव आहे. विष्णुकुमार शेळके (२२, रा. पिंपरी) असे मृत्यू झालेल्या तरुणाचे नाव आहे.
मिळालेल्या माहितीनुसार, गेल्या महिन्यात २२ जानेवारी रोजी रात्री साडेआठच्या सुमारास महापालिका भवन परिसरात भरधाव ट्रकने दुचाकीला धडक दिली. अपघातात दुचाकीस्वार पृथ्वीराज शेळके याचा मृत्यू झाला होता. अपघातानंतर ट्रकचालक पसार झाला. पोलिसांना वाहन क्रमांक मिळाला नव्हता.
पोलिसांनी महापालिका भवन परिसरातील तब्बल २५० सीसीटीव्ही कॅमेऱ्यांच चित्रीकरण तपासले. तेव्हा अपघातानंतर ट्रकचालक गाडगीळ पुतळा परिसरातून कुंभारवेस चौकातून मालधक्का परिसरात गेल्याचे आढळून आले. पोलिसांचे पथक तेथे पोहोचले. तेव्हा ट्रकचालक हैदराबादला गेल्याची माहिती मिळाली.
दरम्यान, हैद्राबादहून ट्रकचालक निघाला असून तो मालधक्का परिसरात येणार असल्याची माहिती मिळाली. त्यानंतर पोलिसांच्या पथकाने ट्रकचालक खान याला मालधक्का परिसरात ताब्यात घेतले. चौकशीत त्याने अपघाताची कबुली दिली. या घटनेचा पुढील तपास पोलीस करत आहेत.
