पुणे : केडगाव चौफुला येथे रस्तावर उसाचा ट्रेलर पालटल्याने आई, वडील व मुलगा गंभीर जखमी झाले असून तिघांच्या पायाला मोठ्या प्रमाणात मार लागला आहे. रस्त्यांवर असणाऱ्या खड्ड्यामुळे हा अपघात झाला आहे.
सुधाकर मच्छिंद्र चव्हाण (वय ४३), वैशाली सुधाकर चव्हाण (वय ३८), ओंकार सुधाकर चव्हाण (वय १७) तिघेही (रा. बोरीपार्धी, ता. दौंड, मूळगाव वैराग, ता. बार्शी) हे या अपघातात जखमी झाले.
रविवारी (ता.८) रात्री साडेसात वाजण्याच्या सुमारास मिशन कॉर्नरजवळ चव्हाण पतीपत्नी दुचाकीवरून घरी जात होते. तर त्यांच्यासमोरच मुलगा ओंकार सायकलवरून रस्त्याच्याकडेने जात होता.
खड्ड्यात हेलकावा बसल्याने ऊसाचा ट्रेलर (क्रमांक एमएच ४२ क्यू २७८३) उलटला. ट्रेलरमधील ऊसाखाली ओंकार व त्याची आई वैशाली गाडले गेले. तर सुधाकर चव्हाण यांना ऊसाचा मार लागल्याने त्यांच्या दोन्ही पायांना जखमा झाल्या आहेत. वैशाली व ओंकार या दोघांना बेशुद्धावस्थेत दवाखान्यात दाखल करण्यात आले. ओंकार बोरीपार्धीतील नाथनगर विद्यालयात दहावीत शिकत आहे.
रस्त्यातील खड्डे बुजवण्याचे काम तातडीने करण्यात यावे, अशी मागणी परिसरातील प्रवासी व स्थानिक ग्रामस्थांकडून होत आहे.
