फिजा शेख
दौंड : घरी कोणी नसल्याचा फायदा घेत अज्ञात चोरट्यांनी घरफोडी करताना रोख रकमेसह सुमारे दीड लाख रुपयांचे सोन्याचे दागिने चोरून नेल्याची घटना गोपाळवाडी (ता.दौंड) ग्रामपंचायत हद्दीतील भागवतवस्ती परिसरात गुरुवारी (ता.५) सायंकाळी सहा वाजण्याच्या सुमारास उघडकीस आली.
याप्रकरणी अक्षय बाळासाहेब बनकर (वय-२२ रा. भागवतवस्ती, दौंड) यांनी दौंड पोलीस ठाण्यात फिर्याद दिली आहे. त्यानुसार अज्ञात चोरट्यांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, अक्षय बनकर हे त्यांच्या वैयक्तिक कामानिमित्त गुरुवारी सकाळी १० वाजण्याच्या सुमारास घर बंद करून बाहेर गेले होते. बनकर हे संध्याकाळी ६ वाजण्याच्या सुमारास घरी आले असता, त्यांना घराच्या दरवाज्याचे कुलूप तुटलेले आढळून आले. त्यांनी घरात जाऊन पहिले असता, अज्ञात चोरट्याने घरातील सोन्याचा लक्ष्मी हार, दोन सोन्याचे कानातील चैन, दोन सोन्याचे कानातील टॉप्स, चांदिचे दोन पैंजन, ब्रेसलेट व ६० हजार रुपये रोख रक्कम असा सुमारे १ लाख ५३ हजार ३०० रुपयांचा मुद्देमाल चोरून नेल्याचे निदर्शनास आले.
दरम्यान, याप्रकरणी अक्षय बनकर यांनी दौंड पोलीस ठाण्यात फिर्याद दिली आहे. त्यानुसार अज्ञात चोरट्यांच्या विरोधात गुन्हा दाखल करण्यात आला असून पुढील तपास दौंड पोलीस करीत आहेत.
