पुणे : पुणे मनपा ते तळेगाव ढमढेरेला या ठिकाणी जाणाऱ्या धावत्या पीएमपी बसमध्ये महिलेशी लगट करणाऱ्या आरोपीला विमानतळ पोलिसांनी अटक केली आहे.
नवल बाळकृष्ण पाटील (वय ४८, रा. कारेगाव, ता. शिरुर, जि. पुणे) असे अटक करण्यात आलेल्या आरोपीचे नाव आहे. याप्रकरणी एका पिडीत महिलेने विमानतळ पोलीस ठाण्यात फिर्याद दिली होती.
पोलिसांनी दिलेल्या माहितीनुसार, पिडीत महिला या पुणे मनपा ते तळेगाव ढमढेरे या मार्गावरील पीएमपी बसमध्ये प्रवास करत होत्या. त्यावेळी बसमध्ये गर्दी होती. आरोपीने बसमधील गर्दीचा फायदा घेत महिलेशी लगट करण्याचा प्रयत्न केला. घटनेनंतर महिलेने आरडाओरडा करण्यास सुरुवात केली.
त्यानंतर आरोपी पाटील बसमधून उतरुन पसार झाला. याप्रकरणी प्रवासी महिलेचा विनयभंग केल्याप्रकरणी विमानतळ पोलिस ठाण्यात एकाच्या विरोधात गुन्हा दाखल करण्यात आला आहे.
दरम्यान, गुन्हा दाखल होताच विमानतळ पोलिसांनी तपासाची चक्रे फिरवून आरोपी नवल पाटील याचा शोध घेत आरोपीला सापळा रचून मोठ्या शिताफीने अटक केली आहे. या प्रकरणाचा पुढील तपास विमानतळ पोलिस करत आहेत.
