भोर / जीवन सोनवणे : वृद्ध महिला बँक खात्यात पैसे भरण्यासाठी गेली असता अज्ञात व्यक्तीकडून बँकेच्या चलनावर काहीतरी लिहायचे राहिले, असे सांगून वृद्ध महिलेची २९ हजार रुपयांची फसवणूक करण्यात आली. ही घटना सोमवारी (दि.१८) शहरातील राजवाडा चौकातील जनता बँकेत घडली.
मिळालेली अधिक माहिती अशी की, भोर येथील जनता सहकारी बँक येथे सोमवारी रत्नप्रभा रामचंद्र बांदल संजय नगर (भोर) या वृद्ध महिला सुमारे ६६ हजार ८०० रुपये बँक खात्यात भरण्यासाठी गेल्या असता गर्दीचा फायदा घेत एका अज्ञात व्यक्तीने ‘आजी तुमच्याकडून चलनावर अर्धवट माहिती भरली गेली. ती पूर्ण भरावी लागेल’, असे सांगून हातातील पैसे व चलन घेतले. पूर्ण रकमेतील २९ हजार रुपये लांबविले असून, वृद्ध महिला पैसे भरण्यास कॅश काऊंटरवर गेली असता पैसे कमी असल्याबाबत लक्षात आले. त्यानुसार आपली फसवणूक झाली लक्षात आल्यानंतर स्थानिक पोलिसांना याची कल्पना देण्यात आली.
या फसवणुकीचा प्रकार बँकेतील सीसीटीव्ही फुटेजमध्ये कैद झाला असल्याचे नातेवाईकांकडून सांगण्यात आले. या घटनेबाबत भोर पोलिसात अज्ञात चोरट्याविरुद्ध गुन्हा दाखल करण्यात आला असून, पुढील तपास भोर पोलीस करत आहेत.
