पुणे : कात्रज घाटात एसटी बस आणि दुचाकीचा झालेल्या भीषण अपघातात दुचाकीस्वार जागीच ठार झाला असून एकजण गंभीर जखमी झाल्याची घटना शुक्रवारी (ता.०४) सायंकाळी सहा वाजण्याच्या सुमारास घटना घडली आहे. या अपघातामुळे घाटात काही काळ वाहतूक कोंडी झाली होती.
अमोल टकले ( वय १८, रा. भवानी पेठ) असे अपघातात मृत्युमुखी पडलेल्या तरुणाचं नाव आहे. तर पवन जाधव, असे अपघातात जाख,इ झालेल्या तरुणाचे नाव आहे.
पोलिसांनी दिलेल्या माहितीनुसार, नाशिक-सांगली ही राज्य परिवहन महामंडळाची बस पुण्याहून कात्रज घाटातून साताऱ्याच्या दिशेने निघाली होती. दुचाकीवरील दोघे खेड शिवापूरहून घाटातून पुण्याकडे येत होते. घाटात तीव्र उतारावर बस आणि दुचाकीचा अपघात झाला. या अपघातात दुचाकीवरील अमोल हा जागीच ठार झाला तर पवनला उपचारासाठी रुग्णालयात दाखल करण्यात आलं आहे.
दरम्यान, मागील काही काळापासून रस्ते अपघातात मोठी वाढ झाली आहे. वाहनांच्या वेगमर्यादेचं पालन न केल्यानेच यातील बहुतांश दुर्घटना घडतात. अशा अपघातांमध्ये मृत्युमुखी पडणाऱ्यांमध्ये तरुणांचं प्रमाण सर्वाधिक आहे. त्यामुळे रस्त्यावर होणाऱ्या दुर्घटना टाळण्यासाठी नियमांचं पालन करण्याची गरज पुन्हा एकदा अधोरेखित झाली आहे.
