(SSC Paper Leak ) पुणे : पुण्यात दहावीच्या गणित भाग एकचा पेपर महिला सुरक्षारक्षकाच्या मोबाईल फोनमध्ये आढळल्याने खळबळ उडाली आहे. या प्रकरणी( SSC Paper Leak ) दहावीच्या परीक्षा केंद्रावर परवानगी नसतानाही हॉलमधील फोटो काढल्याने सुरक्षारक्षकावर गुन्हा दाखल करण्यात आला आहे.
मनीषा कांबळे असे विद्यालयातील सुरक्षारक्षक महिलेचे नाव आहे. बिबवेवाडी येथील यशवंतराव चव्हाण माध्यमिक विद्यालयातील ही सुरक्षारक्षक आहे.
मिळालेल्या माहितीनुसार, पुण्यातील अनेक शाळांमध्ये मागील काही दिवसांपासून सुरळीतपणे दहावी, बारावीच्या परीक्षा सुरु होती. परंतु बिबवेवाडी येथील यशवंतराव चव्हाण माध्यमिक विद्यालयातील सुरक्षरक्षकाच्या फोनमध्ये पेपर आढळला. १३ मार्चला गणित भाग एकचा पेपर होता.
यावेळी विद्यालयातील सुरक्षारक्षक असलेल्या मनीषा कांबळे यांनी परीक्षा हॉलमध्ये जाऊन पेपरचे फोटो काढले. बोर्डाचे पथक १५ मार्चला तपासणीसाठी विद्यालयात गेले असता आरोपी महिलेवर पथकाचा संशय आला. यावेळी तिच्या मोबाईल फोनची झाडाझडती घेतली असता गणित भाग एक प्रश्नपत्रिकेचे फोटो काढल्याचं समोर आलं.
दरम्यान, यावेळी पथकाने तातडीने संबधित महिलेकडे चौकशी केली. मात्र उडवाउडवीची उत्तरे देण्यात आली. त्यामुळे अखेर पथकाकडून बिबवेवाडी पोलीस ठाण्यात तक्रार दाखल करण्यात आली. यानंतर पोलिसांनी या प्रकरणी गुन्हा दाखल केला आहे.
