पुणे : शहर आणि परिसरात गुन्हेगारी प्रवृत्ती वाढीस लागली आहे. गोखलेनगर भागातील जनवाडी परिसरात गुंडांनी तलवारीच्या साह्याने तीन दुकानांची तोडफोड केली तर एकावर तलवारीने सपासप वार केले. याप्रकरणी चतु:शृंगी पोलिसांनी दोघांना अटक केली असून, साथीदारांविरुद्ध गुन्हा दाखल केला आहे.
याबाबत मिळालेल्या अधिक माहितीनुसार, योगेश अनंता गायकवाड, मयूर मोरे अशी अटक करण्यात आलेल्यांची नावे आहेत. याबाबत सुहास सुरेश माने (वय ३०, रा. शांतीनगर सोसायटी, सकाळनगर) यांनी चतु:शृंगी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, गायकवाड आणि मोरे हे दोघेही सराईत गुन्हेगार आहेत. या दोघांसह एका साथीदाराचा दोन दिवसांपूर्वी जनवाडी परिसरातील एकाशी वाद झाला होता. या वादातून त्यांनी रात्रीच्यावेळी तलवारी उगारुन दहशत माजविली. अक्की मेन्स पार्लर, राजकमल स्वीट मार्ट, न्यू तृप्ती चिकन सेंटर या दुकानांची त्यांनी तोडफोड केली. त्याचदरम्यान, सुररेश माने हे उपाहारगृहातून जेवण घेऊन घरी निघाले होते. त्यांना समोरच दुकानांची तोडफोड करण्यात येत असल्याचे दृश्य दिसले. संशय आल्याने माने यांनी दुचाकी थांबविली.
फिर्यादी माने यांनी हटकल्याचा आरेपींना राग आला. याच कारणास्तव आरोपींनी काय बघतो, अशी विचारणा माने यांना केली. त्यानंतर रागाच्या भरात माने यांच्या खांद्यावर तलवारीने सपासप वार केले. तलवारी उगारुन आरोपींनी परिसरात दहशत माजविली. तसेच आजूबाजूच्या दुकानदारांना धमकावून दुकाने बंद करण्यास सांगितले.
या घटनेचा अधिक तपास सहायक पोलीस निरीक्षक कोळी करत आहेत.
