उरुळी कांचन : घरात कोणतीही तोडफोड न करता किंवा कपाट न उचकटता कुलूप नसलेल्या कपाटातून अज्ञात चोरट्याने घरातून तब्बल 1 लाख 32 हजार 871 रुपयांचे सोन्याचे दागिने चोरून नेल्याची घटना 10 जून 2026 ते मंगळवारी (ता. 07 जुलै) दुपारी बारा वाजण्याच्या सुमारास कोरेगाव मूळ (ता. हवेली) ग्रामपंचायत हद्दीतील गोळीबार मैदान येथे घडली.
याबाबत नंदा गोपीनाथ बिराजदार (वय-45, रा. गोळीबार मैदान, कोरेगाव मूळ, ता. हवेली) यांनी उरुळी कांचन पोलीस ठाण्यात फिर्याद दिली आहे. त्यांच्या फिर्यादीवरून अज्ञात चोरट्याविरुद्ध घरफोडी व चोरीचा गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी नंदा बिराजदार या मजुरी करून कुटुंबाचा उदरनिर्वाह करतात. त्यांची विवाहित मुलगी पूजा दत्तात्रय माने ही त्यांच्या शेजारीच एका पत्र्याच्या शेडमध्ये राहते. सुरक्षेच्या कारणास्तव मुलीने आपले सोन्याचे सर्व दागिने आईच्या (नंदा यांच्या) घरातील लाकडी कपाटाच्या ड्रॉवरमध्ये विश्वासाने ठेवण्यास दिले होते. या कपाटाला कुलूप नव्हते.
7 जुलै 2026 रोजी दुपारी बारा वाजण्याच्या सुमारास नंदा यांची बहीण ललिता बापू कुंजीर ही त्यांच्या घरी आली होती. तिने घालण्यासाठी काही दागिने मागितले असता, नंदा यांनी कपाट उघडून पाहिले. त्यावेळी कपाटात ठेवलेले सोन्याचे दागिने जागेवर नसल्याचे त्यांच्या लक्षात आले. कपाटाला कुलूप नसल्याने कोणीतरी अज्ञात व्यक्तीने घरात शिरून दागिन्यांवर डल्ला मारल्याचे उघड झाले.
दागिने चोरीला गेल्यानंतर नंदा बिराजदार यांनी कुटुंबातील आणि संपर्कातील सर्व लोकांना या दागिन्यांबाबत विचारणा केली. घरातीलच किंवा नात्यातील कोणीतरी हे दागिने घेतले असावेत आणि ते परत मिळतील, या आशेपोटी त्यांनी काही दिवस पोलिसांत जाणे टाळले. मात्र, आठवडा उलटूनही दागिने न मिळाल्याने अखेर त्यांनी उरुळी कांचन पोलिसांत तक्रार दाखल केली.
दरम्यान, अज्ञात चोरट्याने कपाटातून एकूण 1 लाख 32 हजार 871 रुपये किमतीचे (जुन्या खरेदी दरानुसार) सोने लंपास केले आहे. यामध्ये सोन्याचे गंठण, कानातील साखळी व टॉप्स, गोल सोन्याची चैन, सोन्याचे दोन बदाम, सोन्याची अंगठी असा मुद्देमाल चोरून नेला आहे . याप्रकरणी उरुळी कांचन पोलिसांनी अज्ञात चोरट्याविरुद्ध गुन्हा दाखल केला असून पुढील तपास पोलीस हवलदार विकास लगस करीत आहेत.
