शिक्रापूर : शिक्रापूर ग्रामपंचायत हद्दीतील चाकण चौक परिसरात दोघेजण बोलत असताना अज्ञात व्यक्तीने येऊन त्यांच्या दिशेने गोळीबार केल्याची घटना घडली आहे.
याप्रकरणी रोहन राकेश पाठक (वय २३, रा. पाटवस्ती शिक्रापूर, ता. शिरूर) यांनी शिक्रापूर पोलीस ठाण्यात फिर्याद दिली आहे. त्यानुसार पोलिसांनी अज्ञात युवकावर गुन्हा दाखल करण्यात आला आहे.
पोलिसांनी दिलेल्या माहितीनुसार, शिक्रापूर येथील चाकण चौक परिसरात रोहन पाठक व अजय चव्हाण रात्रीच्या सुमार उभे होते. त्यावेळी एका युवक दुचाकीवरून आला. आल्यानंतर त्याने दुचाकीची लाईट सुरु करून त्याचा प्रकाश या दोघांच्या डोळ्यांवर मारला. त्यानंतर त्याने या दोघांना शिवीगाळ तसेच दमदाटी करण्यास सुरुवात केली. यावेळी अचानक अज्ञाताने कमरेला लावलेले पिस्तूल काढून रोहनवर रोखून गोळीबार केला. त्यानंतर पिस्तूल रोहनच्या डोक्याला लावून निघून जा, नाहीतर गोळीच घालीन, अशी धमकी दिली.
सदर घटनेची माहिती मिळताच पोलीस निरीक्षक प्रमोद क्षिरसागर, सहाय्यक पोलीस निरीक्षक वैभव पवार, रणजीत पठारे, पोलीस हवालदार श्रीमंत होनमाने, शिवाजी चितारे, आत्माराम तळोले, मिलिंद देवरे, पोलीस शिपाई किशोर शिवणकर, जयदीप देवकर, अंकुश चौधरी यांनी सदर ठिकाणी धाव घेत पाहणी केली असता त्यांना येथे गोळीची पुंगळी मिळून आली. पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली पोलीस उपनिरीक्षक अमोल खटावकर हे करत आहे.
