सातारा : मुंबईतील बांद्रा पोलीस स्टेशनमध्ये कार्यरत असलेल्या पोलिसाने साताऱ्यातील कोडोली येथे पत्नीच्या माहेरात येऊन गळफास घेऊन आत्महत्या केल्याची घटना समोर आली आहे. या घटनेने परिसरात खळबळ उडाली आहे. त्यांना या आत्महत्येस प्रवृत्त केल्याप्रकरणी पत्नीसह सहा जणांच्यावर गुन्हा दाखल करण्यात आला आहे.
याबाबत अधिक माहिती अशी की, अमोल लक्ष्मण जाधव हे मुंबईतील बांद्रा इथे पोलीस होते. त्यांची पत्नी कोमल जाधव आणि सूरज भोसले हे दोघे त्यांना मानसिक त्रास देत होते. पत्नी कोमल यांनी अमोलचा दुसरा विवाह लावून दिला. त्यानंतर कोमलने अमोल यांच्यावर खोटी केस दाखल केली होती. मात्र ही केस मागे घेण्यासाठी २० लाख रुपयांची संशयितांनी मागणी केली होती. पैसे दिले नाही, तर नोकरी घालवतो, अशी धमकीही अमोल जाधव यांना दिली जात होती. त्यांचा मुलगा अद्विक याला भेटू दिले जात नव्हत,त्यामुळे ते मानसिक दडपणाखाली आले. या सर्व घटनेमुळे त्यांनी आत्महत्या केल्याची तक्रार अमोल जाधव यांच्या भावाने सातारा शहर पोलीस ठाण्यात दिली आहे.
या तक्रारीनंतर पत्नीसह सहा जणांच्या वर गुन्हा दाखल करण्यात आला आहे.पत्नी कोमल अमोल जाधव (रा. सातारा), सूरज भोसले (रा. घाडगेवाडी, ता. फलटण), प्रवीण अडसूळ, शिवाजी अडसूळ, सौरभ सकट, विवेक काटकर (सर्व रा. सातारा) अशी संशयितांची नावं आहेत. याप्रकरणी सचिन लक्ष्मण जाधव (वय ३५, सध्या रा. मुंबई, मूळ रा. सासवड झणझणे, ता. फलटण) यांनी तक्रार दिली आहे
