पुणे : मुंबईतील ताडदेव परिसरात एका 20 वर्षीय विद्यार्थ्याने इमारतीवरून उडी मारून स्वतःचे आयुष्य संपवल्याची धक्कादायक घटना समोर आली आहे. कार्तिक असे या मृत तरुणाचे नाव असून, तो जयपूरचा मूळ रहिवासी होता. त्याचे वडील राजस्थान सरकारमध्ये वरिष्ठ अधिकारी पदावर कार्यरत असल्याची प्राथमिक माहिती समोर आली आहे.
मिळालेल्या माहितीनुसार, कार्तिक मुंबईत व्यवस्थापन शाखेचे (मॅनेजमेंट) शिक्षण घेत होता. अभ्यासासाठी तो ताडदेव परिसरातील ‘आदित्याची हाईट्स’ या इमारतीमध्ये राहत होता. सोमवारी रात्रीच्या सुमारास त्याने या इमारतीच्या 12 व्या मजल्यावरील ‘रेफ्युजी एरिया’मध्ये जाऊन अचानक खाली उडी घेतली.
उंचावरून खाली पडल्याचा प्रचंड आवाज झाल्यानंतर परिसरातील रहिवाशांनी आणि सुरक्षा रक्षकांनी तातडीने त्या दिशेने धाव घेतली. मात्र, थेट 12 व्या मजल्यावरून पडल्यामुळे गंभीर दुखापत होऊन कार्तिकचा घटनास्थळीच मृत्यू झाला होता.या घटनेची माहिती मिळताच ताडदेव पोलीस ठाण्याचे पथक त्वरित घटनास्थळी दाखल झाले. पोलिसांनी घटनेचा पंचनामा करून मृतदेह शवविच्छेदनासाठी नायर रुग्णालयात पाठवला आहे.
एका तरुण विद्यार्थ्याने अचानक इतके टोकाचे पाऊल का उचलले, याचे कारण अद्याप समोर आलेले नाही. मानसिक तणाव किंवा अन्य कोणत्या कारणास्तव ही घटना घडली आहे का, या सर्व बाबींचा ताडदेव पोलीस सखोल तपास करत आहेत. सध्या पोलिसांनी या प्रकरणी अकस्मात मृत्यूची नोंद केली असून, पुढील तपास सुरू आहे.
