मुंबई : शहरातील लोअर परळ भागात १५ वर्षीय तरुणीवर सामूहिक बलात्कार करण्यात आल्याची घटना घडली असून याप्रकरणी पोलिसांनी ६ आरोपींना ताब्यात घेतलं असून यातील ३ आरोपी अल्पवयीन असल्याची माहिती आहे.
ही घटना २३ डिसेंबर रोजी घडली असून अल्पवयीन मुलीवर झालेल्या अत्याचाराने शहरात खळबळ उडाली आहे.
मिळालेल्या माहितीनुसार, १५ वर्षीय तरुणीला तिच्या मित्राने दुसऱ्या एका मित्राच्या घरी बोलावले. तिथे गेल्यानंतर पीडितेवर ६ आरोपींनी बलात्कार केला. या घटनेनंतर घाबरलेल्या पीडित तरुणीने घरी धाव घेत आपल्या कुटुंबियांना याबाबतची माहिती दिली.
त्यानंतर कुटुंबियांनी ताबडतोब पोलीस ठाण्यात तक्रार दिली. या तक्रारीची दखल घेत पोलिसांनी आरोपींचा शोध घेतला आणि अवघ्या काही तासांत ६ जणांना बेड्या ठोकल्या.
पोलिसांकडून अटक करण्यात आलेल्या ६ पैकी ३ पैकी आरोपी हे अल्पवयीन असल्याने त्यांना बालसुधारगृहात ठेवण्यात आलं आहे. तसंच उर्वरित तिघांना कोर्टात हजर करण्यात आले.
या तीन आरोपींना कोर्टाने ३० डिसेंबरपर्यंतची पोलीस कोठडी सुनावली आहे. दरम्यान, याप्रकरणी पोलिसांकडून आणखी पुरावे मिळवण्याचा प्रयत्न केला जात असून अधिक तपास सुरू आहे.
