पुणे – एटीएममधून पैसे काढण्यासाठी गेलेल्या तरुणावर तिघांनी शस्त्राने वार करून गंभीर जखमी केल्याची धक्कादायक घटना धनकवडीतील चव्हाणनगर परिसरात घडली आहे. याबाबत सहकारनगर पोलीस ठाण्यात जखमी झालेल्या तरुणाने फिर्याद दिली आहे.
शिवशंकर थोरात (वय २७, रा. धनकवडी) असे गंभीर जखमी झालेल्या तरुणाचे नाव आहे.
मिळालेल्या माहिती नुसार, थोरात हा रविवारी ( ता. २) रात्री सव्वानऊच्या सुमारास चव्हाणनगरमधील निर्मल पार्क इमारतीत असलेल्या एका बँकेच्या एटीएम केंद्रात पैसे काढण्यासाठी गेला.
एटीएमधून पैसे काढून बाहेर येत असताना, त्याला तिघांनी मारहाण करण्यास सुरुवात केली. त्यानंतर त्याच्यावर कोयत्याने वार केले. या घटनेत तो गंभीर जखमी झाला. या हल्ल्यामागचे कारण अद्याप समजू शकले नाही. या घटनेचा तपास पोलीस उपनिरीक्षक राहुल खंडाळे करत आहेत.
