अमोल दरेकर
Shirur News : सणसवाडी (पुणे) : नऊ दिवसांपूर्वी वडिलांचे निधन झाल्याची घटना ताजी असतानाच ३५ वर्षीय मुलाचाहि चौथ्या मजल्यावरून खाली पडून मृत्यू झाल्याची हृदयद्रावक घटना घडली आहे.
हृदयद्रावक घटना
सणसवाडी (ता. शिरूर) ग्रामपंचायत हद्दीत घडली आहे. बुधवारी (त. ११) हि घटना घडली आहे.
नामदेव मोहन हरगुडे (रा. ३५, सणसवाडी ता. शिरूर) असे खाली पडून मृत्यू झालेल्या ३५ वर्षीय तरुणाचे नाव आहे.
मिळालेल्या माहितीनुसार, बुधवारी नामदेव हरगुडे हे घराच्या टेरेसवरील चौथ्या मजल्यावर पाण्याची मोटर चालू करण्यासाठी गेले होते. यावेळी त्यांचा तोल गेला व ते जमिनीवर कोसळले. या घटनेत गंभीर जखमी झाल्याने त्यांना तात्काळ जवळच्या रुग्णालयात हलवण्यात आले होते. तोंडाला मोठ्या प्रमाणात मार लागल्याने डॉक्टरांनी त्यांना उपचारापूर्वीच मृत घोषित केले.
दरम्यान, नामदेव हरगुडे यांच्या वडिलांचे अवघ्या नऊ दिवसांपूर्वी अल्पशा आजाराने निधन झाले होते. अवघ्या नऊ दिवसांत एकाच कुटुंबातील दोन सदस्यांचा मृत्यू झाल्याने हळहळ व्यक्त करण्यात येत आहे. तसेच परिसरात शोककळा पसरली होती. या घटनेची माहिती मिळताच व्यापाऱ्यांनी व्यवहार बंद करत शोक व्यक्त केला. त्यांच्या पश्चात आई, पत्नी, आजोबा, मुलगा, मुलगी, चुलते, चुलत भाऊ असा परिवार आहे.
