Shirur : शिरूर तालुक्यातील भांबर्डे येथे अत्यंत धक्कादायक आणि मन सुन्न करणारी घटना उघडकीस आली असून,आईनेच स्वतःच्या ११ महिन्यांच्या मुलाचा खून केल्याची कबुली दिल्याने परिसरात खळबळ उडाली आहे.या प्रकरणी रांजणगाव एमआयडीसी पोलिसांनी महिलेस अटक केली आहे.
या प्रकरणी रांजणगाव एमआयडीसी पोलिसांनी दिलेल्या माहितीनुसार, रांजणगाव एमआयडीसी पोलीस ठाण्यात संबंधित गुन्हा दाखल करण्यात आला आहे.फिर्यादी रवींद्र अशोक पवार(वय 36,रा.भांबर्डे,ता. शिरूर,जि.पुणे)यांनी दिलेल्या फिर्यादीवरून ही कारवाई करण्यात आली आहे.पोलिसांनी रवींद्र पवार यांची पत्नी पूजा रवींद्र पवार हिला अटक केली आहे.
वरील घटना ८ मार्च २०२६ रोजी सायंकाळी साडेपाचच्या सुमारास भांबर्डे येथील परिसरातील रवींद्र पवार यांच्या शेतातील विहिरीजवळ घडली.याप्रकरणी सुरुवातीला अकस्मात मृत्यूची नोंद करण्यात आली होती.मात्र,पोलिसांच्या सखोल तपासात धक्कादायक सत्य समोर आले.
तपासादरम्यान आरोपी महिलेने कबुली दिली की,कोकणातील मुरुड येथे फिरून आल्यानंतर तिचा ११ महिन्यांचा मुलगा यश हा सतत रडत होता.वैयक्तिक कारणांमुळे महिलेने दुसरे लग्न करण्याचा विचार केला होता.मात्र,मुलाला सोबत घेतल्यास लग्न होणार नाही,या विकृत विचारातून तिने मुलाचा जीव घेतल्याचे समोर आले.
तिने मुलाचे डोके घरासमोरील सिमेंटच्या ओट्यावर आपटून त्याचा खून केला.त्यानंतर पुरावा नष्ट करण्याच्या उद्देशाने ओट्यावरचे रक्त पाण्याने धुऊन काढले.पुढे मुलाचा मृतदेह कपड्यांच्या बॅगेत भरून त्यात दगड टाकून शेतातील विहिरीत फेकून दिला,असे तपासात निष्पन्न झाले आहे.
या घटनेनंतर पोलिसांनी तत्काळ कारवाई करत आरोपी महिलेला अटक केली आहे.घटनास्थळी उपविभागीय पोलीस अधिकारी प्रशांत ढोले,पोलीस निरीक्षक महादेव वाघमोडे,सहाय्यक पोलीस निरीक्षक अशोक चव्हाण,पोलीस उपनिरीक्षक निळकंठ तिडके यांच्यासह पोलिस पथकाने भेट दिली.तसेच वैद्यकीय अधिकारी डॉ.सागर डांगे व फॉरेन्सिक टीमने घटनास्थळी पाहणी करून तपासात सहकार्य केले.
या प्रकरणाचा पुढील तपास पोलीस उपनिरीक्षक निळकंठ तिडके करीत असून,या घटनेमुळे संपूर्ण परिसरात संताप आणि हळहळ व्यक्त केली जात आहे.
