पुणे : चारचाकी गाडीत पोलीस नावाची नेमप्लेट लावून आय बी असा लोगो लावणार्‍या तोतया पोलिसाला चंदननगर पोलिसांनी बेड्या ठोकल्या आहेत. इमाउद्दीन नाफिरुद्दीन इरफान (वय-३७, रा. गोदरेज इन्फिनिटी सोसायटी, केशवनगर, मुंढवा) असे या तोतया पोलिसांचे नाव आहे. याबाबत पोलीस अंमलदार नामदेव विठ्ठल गडदरे यांनी चंदननगर पोलीस ठाण्यात फिर्याद दिली आहे. हा प्रकार चंदननगरमधील नागपोल रोडवरील मोकळ्या मैदानाच्या कडेला शुक्रवारी दुपारच्या सुमारास घडला आहे.
पोलिसांनी दिलेल्या माहितीनुसार, इमाउद्दीन इरफान हा काळे रंगाची टोयाटा कार घेऊन या ठिकाणी आला होता. त्या गाडीला पोलीस अधिकारी वापरतात, तशीच पोलीस नावाची नेमप्लेट लावण्यात आली होती. गाडीत पोलीस लाठी व आय बी असा लोगो देखील जवळ बाळगला होता. पोलिसांना शंका असल्याने त्यांनी चौकशी केल्यावर तो तोतया असल्याचे आढळून आले आहे. पोलिसांनी तोतया पोलीसाला अटक केली आहे. याप्रकरणाचा अधिकच तपास पोलीस हवालदार रणदिवे करीत आहेत.
