बारामती : सहलीवरून परतणाऱ्या ४८ विद्यार्थिनींच्या बसचा अपघात झाल्याची घटना पाहुणेवाडी (ता. बारामती) ग्रामपंचायत हद्दीत शनिवारी (ता.३१) पहाटे तीन वाजण्याच्या सुमारास घडली. या अपघातात २७ मुली जखमी झाल्या असून त्यातील ३ मुली गंभीर जखमी झाल्या आहेत.
मिळालेल्या माहितीनुसार, इचलकरंजी येथील सागर क्लासेस या खाजगी क्लासेसच्या विद्यार्थिनींची सहल शिर्डी व औरंगाबाद येथे गेली होती. या सहलीला गेलेल्या बसमध्ये ४८ विद्यार्थिनी व ४ शिक्षकांचा समावेश होता. बस बारामतीमार्गे शिर्डीहून इचलकरंजीला माघारी निघाली होती.
दरम्यान, पाहुणेवाडी येथून जात असताना, बस चालकाला अंदाज न आल्याने व चालकाचे बसवरील नियंत्रण सुटल्याने बस पुलावरून थेट खाली गेली. यामध्ये तीन मुली गंभीर जखमी झाल्या असून २४ मुलींना किरकोळ दुखापत झाली आहे. जखमींना उपचारासाठी बारामतीत शासकीय रुग्णालयात दाखल करण्यात आले आहे.
