पुणे : बस प्रवासात जाणीवपूर्वक तरुणीच्या अंगाशी लगट करणाऱ्या पीएमपी बस कंडक्टरला सहकारनगर पोलिसांनी बेड्या ठोकल्या आहेत. ही घटना सहकारनगर येथील दाते बसस्टॉप ते के के मार्केटयार्ड बसस्टॉप दरम्यान सोमवारी (ता.२०) सायंकाळी ५ वाजता घडली आहे.
विश्वनाथ केदा ठाकरे (वय ४१, रा. संतोषनगर, कात्रज) असे अटक करण्यात आलेल्या बस कंडक्टरचे नाव आहे. याप्रकरणी एका २२ वर्षाच्या तरुणीने सहकारनगर पोलीस ठाण्यात फिर्याद दिली.
पोलिसांनी दिलेल्या माहितीनुसार, फिर्यादी तरुणी ही सहकारनगरमधील दाते बसस्टॉप येथून बसमध्ये बसली. बसमध्ये गर्दी असल्याचा गैरफायदा घेऊन कंडक्टरने तरुणीच्या अंगाशी लगट करुन फिर्यादीच्या मनास लज्जा उत्पन्न होईल, असे कृत्य केले.
यानंतर तरुणीने सहकारनगर पोलीस ठाण्यात फिर्याद दिली. त्यानुसार पोलिसांनी गुन्हा दाखल करत आरोपी विश्वनाथ ठाकरे याला अटक केली आहे. या घटनेचा पुढील तपास पोलीस करीत आहेत.
