पुणे: पुणे-सोलापूर महामार्गावर लोणी काळभोर परिसरात धक्कादायक घटना घडली आहे. रिक्षा प्रवासी असलेल्या एका तरुणाला रिक्षाचालक आणि त्याच्या साथीदारांनी मारहाण करून त्याच्याकडील मोबाइल फोन तसेच रोकड असा मुद्देमाल लुटला. या प्रकरणी लोणी काळभोर पोलिसांनी रिक्षाचालकासह चौघांविरुद्ध गुन्हा दाखल केला आहे.
या संदर्भात तक्रारदार तरुणाने लोणी काळभोर पोलीस ठाण्यात फिर्याद दिली आहे. तक्रारदार हा लोणी काळभोर परिसरातील कदमवाक वस्तीत वास्तव्यास असून तो मूळचा धाराशिव जिल्ह्यातील लोहारा तालुक्यातील उदतपूर गावचा रहिवासी आहे.
पोलिसांनी दिलेल्या माहितीनुसार, दोन दिवसांपूर्वी दुपारी सुमारे 4.30 वाजता तक्रारदार पुणे-सोलापूर महामार्गावरून प्रवास करण्यासाठी एका रिक्षामध्ये बसला होता. त्या रिक्षामध्ये चालकासोबत आणखी चौघे साथीदार उपस्थित होते. प्रवासादरम्यान रिक्षाचालकाने कदमवाक वस्ती परिसरातील एका हॉटेलजवळ रिक्षा थांबवली.
याच ठिकाणी आरोपींनी तक्रारदार तरुणाला मारहाण केली आणि त्याच्याकडील मोबाइल फोन तसेच खिशातील 3500 रुपये असा मुद्देमाल लुटून पोबारा केला. या घटनेनंतर घाबरलेल्या तरुणाने मंगळवारी लोणी काळभोर पोलीस ठाण्यात धाव घेऊन तक्रार नोंदवली.
या प्रकरणाचा तपास सहायक पोलीस निरीक्षक सोनटक्के करीत आहेत. पोलिसांनी रिक्षाचालकासह चौघांविरुद्ध गुन्हा दाखल करून पुढील तपास सुरू केला आहे.
