पुणे : शिवसेना (उद्धव बाळासाहेब ठाकरे) गटाचे विभागप्रमुख प्रदीप पूर्णेकर यांच्या हत्येचा तपास करणाऱ्या ठाणे गुन्हे शाखेला मोठे यश आले आहे. पोलिसांच्या पथकाने उत्तर प्रदेशातील प्रयागराज येथून मुख्य आरोपी संतोष कनोजिया उर्फ ‘टल्ली’ आणि त्याचा साथीदार अमित सिंग याला ताब्यात घेतले आहे. यांच्या अटकेमुळे या हत्येमागचा मुख्य मास्टरमाइंड कोण, याचा उलगडा होणे सोपे होणार आहे. या प्रकरणात राजकीय व्यक्तीचे नाव आणि सुमारे 5 कोटी रुपयांच्या सुपारीची चर्चा रंगली आहे, ज्याबाबत कोठडीतील चौकशीत महत्त्वाची माहिती समोर येण्याची शक्यता वर्तवली जात आहे.

पूर्णेकर यांची हत्या केल्यानंतर आरोपींनी आपले मोबाईल बंद केले होते आणि गुप्तपणे पसार झाले होते. गेल्या 6 दिवसांपासून ठाणे पोलीस उत्तर प्रदेशात ठाण मांडून होते. प्रयागराजमधील व्हीव्हीआयपी घाट परिसरात लपलेल्या या दोघांना तेथून पकडण्यात आले. आरोपींना स्थानिक पातळीवर कोणी निवारा दिला आणि पळून जाण्यास कोणी मदत केली, याचा शोध घेणे हे पोलिसांसमोर मोठे आव्हान आहे.
ठाणे पोलीस उपायुक्त अमरसिंह जाधव यांनी दिलेल्या माहितीनुसार, अमित सिंग मूळचा उत्तर प्रदेशचा असून तो मीरा-भाईंदर परिसरात ऑटो रिक्षा चालवत असे. एका साध्या रिक्षाचालकाचा या भयंकर कटात सहभाग उघड झाल्याने, ही हत्येची घटना अत्यंत नियोजनबद्ध रीतीने रचल्याचे निष्पन्न होत आहे. या घटनेमागे एखाद्या मोठ्या गुन्हेगारी सिंडिकेटचा किंवा व्यावसायिक मारेकऱ्यांचा हात होता का, या दिशेने तपास सुरू आहे.या गुन्ह्यात आधीच तिघांना पकडण्यात आले होते; मात्र ते तपासात टाळाटाळ करत होते..

दरम्यान, गुन्ह्यात वापरलेली अल्टो कार नवी मुंबईतील एमजीएम रुग्णालय परिसरातून जप्त करण्यात आली असून, फरार असताना वाहने बदलण्यात आली होती का, याचाही शोध घेतला जात आहे.








